Чечексене юратăр,
Юратăр та ан татăр.
Куçпа пăхса киленĕр,
Татса илме именĕр.
Шăпкан та çепĕç çеçпĕл,-
Хисеплемешкĕн çеç пĕл,-
Ģаран çиçсе çуталĕ,
Вăрман- куçа ыталĕ.
Чечек – кунçул илемĕ,
Чечек – телей хĕлхемĕ,
Вунçиччĕри тасалăх,
Асран кайми ачалăх.
Сăнра хĕвеллĕ кулă
Чечек пулсассăн пулĕ.
Чечексене юратăр,
Юратăр та ан татăр.

Мĕн – ма пи! Кайса эс çĕклентĕн, хăваçăм,
Илемлĕх кÿрсе юханшыв çыранне.
Халь ĕнте куç хывнă сана ват ăстаçă,
Лăппа эс вырнаçăн çитсен кĕркунне.

Мĕн-ма кăн-кăвак çеске çуртăн, сиренĕм,
Шерпер пиллесе иксĕлми таврана.
Алли тăсăлать халь кашни çулçÿренĕн,
Парнелĕх татасшăн хăть пĕр сапакна.

Мĕн-ма , улмуççи, çав тĕрлех çимĕç çакрăн?
Ыр ят илтес терĕн пуль эс хуçунтан.
Халь ак чĕтресе çеç ларан, шалкăм çапнăн,
Кашни туратту хуçăлать çурмаран.

Мĕн-ма васкаса пĕве çитрĕн , чиперĕм,
Вутпах çунтаратăн вуншар яш чуна.
Туй кĕтнĕн çиçет ав, асамлăх кĕперĕ.
Туйсам, кÿршĕрех эп, уçсам кантăкна

Ыталаса илес пек ырлăха
Кĕретĕп васкаса юманлăха.

Турат çинче хĕвел çăмхи – пакша,
Ģил-юрăç çеммипе иллет ташша.

Ģунатсăрах вăр-вар вăл мĕнешкел,
Ģăварĕнче юман парни – йĕкел.

Кĕç ларчĕ майлашса турат çине,
Пуçларĕ астивме кучченеçне.

Те именсе, те сисĕм хушнипе
Манран хупланчĕ кăпăш хÿрипе.

-Ан тинкерсем, чун çук куç ÿкесрен.
Пуш йĕкелпе перет мана çÿлтен.

Тĕнче пĕр мар, пул сыхлăхлă ялан,
Эс пур та – кăмăллă кăтра вăрман.

Кăрлач сивви. Вăш çиллĕ ир.
Хĕвелĕн пĕтнĕ тем хĕрÿлĕх.
Уй анлăшĕ- шап-шур кавир-
Куç умĕнче выртать чĕнÿллĕн.

Саватă хĕл тасалăхне.
Пÿртре ларсан часах мăкланăн.
Хир урлă кăпăш юр çине
Хыватăп мăшăр йĕр пит танлăн.

Йăваш çилпе пĕр тупăшса,
Пĕр ăмăртса вăя виçетĕп.
Хăватăма туйса, шанса
Вăрман хĕрне çитсе ÿкетĕп.

Хитре те иксĕлми тĕнче.
Ырра эс ырăпа саплатăн.
Яштак хырсен ытамĕнче
Чуна эмелсĕр сывататăн.

Ģул каялла, таçта та кĕрт.
Ирхи йĕре тупаймăп халĕ.
Пурнăçăмра эп хывнă йĕр
Нивушлĕ хыçранах çухалĕ?

Таврари вӑрмансем, уй-хирсем, Шетмӗ шывӗ, 
Янратать ҫут тӗмче сан ҫинчен ҫӗнӗ кӗвӗ. 
Эс ешер, чечеклен савнӑ ял, Красноармейски, 
Санран ҫывӑх ҫӗр-шыв эпир урӑх пӗлместпӗр. 

Хутлӑ-хутлӑ ҫуртсем ҫӗкленеҫҫӗ мӑнаҫлӑн, 
Сарлака урамсем хулари пек выртаҫҫӗ.
Эс ешер, чечеклен савнӑ ял, Красноармейски, 
Санран ырӑ ҫӗршыв эпир урӑх пӗлместпӗр.

Трак енчи ҫынсене тӑрӑшуллӑ тееҫҫӗ, 
Ӗҫлеме, вӗренме, савӑнма та пӗлеҫҫӗ. 
Эс ешер, чечеклен савнӑ ял, Красмоармейски, 
Санран лайӑх ҫӗр-шыв эпир урӑх пӗлместпӗр.