Ģурхи кунсем асамлăн вăй илсен
Вăрман чĕнет хăй ытамне çуллен.
Умра туйралăх, шĕшкĕлĕх, ĕшне.
Туссем, ан таптăр çеçпĕл çеçкине.

Ģĕр сипетне, хĕвелĕн ăшшине
Вăл чи малтан пиллет тĕнчене.
Кăтра çулçи ем-ешĕл пурăнтан,
Кăвак çеçки вут-хĕм сапать куçран.

Хăват вăл панă Ģеçпĕл Мишшине,
Туйма вĕрентнĕ пурнăç илемне.
Халь ман ăшра, чунра кăвак чечек,
Ун умĕнче пуçа таятăп тек.

Ишетĕп-и Мăн Атăл шывĕпе,
Тăван кĕтес, сан çăлкуçна туятăп.
Кăтра хумсен хавас кĕввийĕпе
Салам яратăп.

Вĕçетĕп-и Çĕршывăм çийĕпе,
Тăван кĕтес, сан сывлăшна туятăп.
Эс ячаран пилленĕ тивлетпе
Салам яратăп.

Иртетĕп-и таçти ют çĕрсемпе,
Тăван кĕтес, сан юрруна тăлатăп.
Вăй-хал парса тăратăн кĕвĕпе,-
Салам яратăп.

Савăнма, Çĕпĕр, ман
Кăмăл пур – суя мар, –
Илтĕм эп Чăвашран
Пĕр лав çĕнĕ хыпар.

Эп çуралнă ялта
Кĕртнĕ газ килсене.
Асфальтпа халь тата
Витнĕ ял хушшине.

Эппин ку чăн хула, –
Ял юлмасть хуларан.
Эп курсассăн яла,
Тен, паллаймăп сăнран...

Савăнатăп – чуна
Хавас кăмăл çĕклет.
Ыр ял-йыш хăнана
Мана шутсăр чĕнет.

“Ан кай. Мĕн тума каян?” –
Терĕ алăк янаххи.
Йăлăнса чунтан-вартан:
“Ан кай”, – терĕ уй хапхи.
“Ан кай”, – терĕ униче,
Темнешкел тархасласа...
Кăвак пĕлĕт ял çинче
Манран юлчĕ макăрса.

Çынсене калаçтарса
Çитĕ.
Шаль çумне
Куршанак çыпăçтарса
Килтĕн ир енне.

Ан тун.
Пурнăç çиппине –
Тытăнтăн тăк –
Тат.
Ыйхăран
Чун йыттине – 
Çыртĕ –
Ан вăрат.