Шыва анать нухай пики – Багаутдин Чечекĕ. 
Хаваслă çемĕ кăларать алра ун пуш чÿлмекĕ.

– Ай, селĕм янратать-çке ку, – шутлать чÿлмек тулашĕ,
Чечек çăлкуç шывне ăссан чăп тулчĕ ун шалашĕ.

Çÿлтен анать аялалла хĕм куçлă юлан утçă.
Халь тĕлпулу кĕвви калать ирхи сăрт-ту çăлкуçĕ.

Йĕплĕ чăрăш шĕвĕр тăррипе
Кармашать çÿле, хĕвел енне,
Çуркуннен сип – симĕс тумĕпе
Вăл çулла, хĕлле те кĕркунне.

Улăштармĕ чăрăш çак тĕсе, 
Ма тесен, вăл: «Симĕс тумпалах
Ĕмĕр – ĕмĕр ларăп эп», – тесе
Панă – мĕн çурхи куна сăмах.

Çĕрĕм – шывăм, ман та сан умра
Пулаясчĕ паттăр чăрăш пек:
Пĕр сăмах парсассăн, пурнăçра
Тытаясчĕ ĕмĕр тăршшĕпе.

Чăвашах çĕршывĕн пикисем –
Сывлăмах шăрçи иккен вĕсем:
Шурăмпуç пек çуттăн çуталсан
Кун килет хĕвеллĕн те тасан.

Чăвашах çĕршывĕн пикисем –
Ылтăн алăллă иккен вĕсем:
Ĕç тытсассăн ĕçĕ те ăнать,
Савăк юрă евĕр шăранать.

Чăвашах çĕршывĕн пикисем –
Çурхиех çеçке иккен вĕсем:
Тĕррисем чечек пек ешерсен
Туйăнать чечекĕн Чăваш ен.

Чăвашах çĕршывĕн пикисем –
Юрату юрри иккен вĕсем:
Юрату иленнĕ чĕрене
Çупăрлать асамлă çуркунне.

06.01.94

Маншăн тесен чăваш сăмахĕсем
Хĕвел çинчи чечек пек ешереççĕ,
Чун-чĕрере вылять таса хĕлхем
Çĕн кĕвĕ хывнăçемĕн сасă речĕ.

Атте, анне, аппа, инке, пичче...
Мĕнле хисеплĕх, мĕн тери тăванлăх,
Çăтмахăн чи хитре кĕтессинче
Эс вырăн тупнăн туйăнать яланлăх.

Юлташ, çулташ, ентеш те саманташ...
Ку йĕркере, туссем, сире куратăп.
Çак сăмахсем пулсан – эпир чăваш,
Чăваш эпир тура та, анатра та.

Умра пăлхар пасарĕ кĕр! кĕрлет,
Ятуллă, чыслă несĕлсем тухаççĕ:
Якку Йăванĕн аллинчен хĕрле
Именчĕклĕн парне илет сухаçă.

Парни – тăван сăмахлăх кĕнеки,
Уй-хир касси пек уçăлать хĕвеллĕн.
Тĕллев те ĕмĕт, пурăнăç екки
Йăлт çырăнса пырать унта йĕркеллĕн.

Акатуйне ниме пек тумалла!
Уяв тени вал – сумлăх, хурăнташлăх,
Пурри – пĕрле, çукки те çурмалла, –
Çак чăнлăхран вăй туянать чăвашлăх.

Ача-пăча...Телей те ăрăс хал –
Кăвак хуппи пек ытарми сенкерлĕх,
Атăл енне çул уçакан Çавал
Пин çăлкуçа пилленĕ пек еткерлĕх.

Ытти чĕлхесене тиркессĕм çук.
Авангардсен, арьергардсен пур карчĕ
Ман хăлхана кăшт ыраттарнă чух
Тăван сăмахшăнах эп пулăп тарçă.

Чĕлхеçĕм! Эсĕ тухăç ен сăпки!
Эс сĕмлĕхрен çĕн тапхăр тăваканĕ.
Кайран, тен, килĕ, таптĕ пысăкки,
Анчах вăл пулĕ пăсăккин таканĕ.

Цивилизацин тимĕр тыллисем
Мăн çул çинче акар йытти пек сикĕç.
Пурнар-ха, шăнкăр-шăнкăрти чĕлхем,
Мĕнпур çăлкуçăн кĕввине эс тивĕç.

Çÿл тÿперен анать шап-шурă ĕнчĕ...
Капла татах та хитререх хула!
Пĕркеннĕ Атăл йăлтăркка пĕркенчĕк,
Тÿлеклĕхпе çĕклет вăл кăмăла.

Вăранайман пулас-ха çил хыпарçă:
Тухйисемпех лараççĕ çăкасем.
Чиркÿ çинче — шап-шурă кăвакарчăн,
Чиркÿ çинче — асамлă пуçилем.

Пирĕштисем юрлан çунатлă юрă
Сăваплăн ыталать урамсене,
Пире курса тăрать пек Аслă Турă,
Ыр сывлăш пехиллет пек чунсене.

Эй, пурнăç! Эсĕ — Атăлтан та аслă,
Пин çăлтăр вăййинчен те кăткăсрах.
Пирти çав тупсăма тĕпчес хаваслăх
Çĕр кăвапи пек тарăн пултăрах.

Хуллен-хуллен шăвать кăрлач хĕвелĕ,
Эпир хуллен утатпăр, ик чăваш.
Эппин, чăвашлăх ниминчен, Ревелĕм,
Юлмасть çак икĕ тахçанхи юлташ.