— Ват çынна никам юратмĕ

Тетĕр пуль?.. — Сахар, ай, ай

Сăмахне ахаль тапратнă

Сухалне якатнă май.

 

— Пиччене кулак тĕп турĕ

Пĕр кĕрхи çанталăкра...

Ах хама та нимĕç турĕ

Муталарĕ тамăкра.

 

Эп гранатăпа çунтартăм

Урса кайнă тăшмана.

Çавăн чух кăна çухатрăм

Хамăн сылтăм урана.

 

Халĕ те çĕрсех пĕтмен-тĕр

Ман ура лаппи унта.

Ун чухне эпир пинтен пĕр

Сывă юлнă ушкăнтан.

 

Тата тепĕр асăнмалăх

“Парне” юлчĕ нимĕçрен.

Кĕр çитсен сивви туймалăх

Пур осколка ман пĕçре.

 

Тимĕрпе чукун туптарĕ

Çĕр çăтман мĕлке нихçан

Çĕнмелле пек çирĕп тирлĕ

Хăйне туйнă пуль, айван.

 

Шур тăхлан — чĕрешĕн сивĕ,

Йывăр хурçă — пусарать.

Туслăхра — этем сып-сывă,

Çĕнтерет вăл пусмăра.

 

Ман тăван çĕршывăм аслă,

— Мĕнпур халăхшăн — телей.

Пурăнма чĕнет хаваслă,

Мирпе туслăх вăл пиллет.

 

Эпир туслăн калаçатпăр

Тĕрлĕ халăх чĕлхипе.

Çавăнпа та мухтанатпăр

Пур тăван пĕрле чухне.

 

Çĕр çинчи пур тĕрлĕ халăх

Çирĕп туслă пулнăран,

Вăйлине курса яланлăх

Тăшман пĕтрĕ паянтан.

 

Эп ак халь те пурăнатăп...

— Терĕ, çитмĕлти мучи —

Савăнса ăна тăнлатăп —

Вăл хăех телей хуçи.

Пĕчченех пурăнать пĕр хĕрарăм
Унччен пулнă сысна ферминче.
Вăтăр ик çулта çеç-ха, вăл çамрăк,
Уншăн пур пĕр кичем çут тĕнче.

Хăй ятпе килĕ çук — ăçта кайăн,
Пурăнать кăмакасăр пÿртре.
Пĕр тĕлте шăтса кайнă урайĕ —
Сивĕпе хăйĕн ÿчĕ чĕтрет.

Пĕр хусах арçынпа вăл çыхланнă,
Кунта килнĕ унпа вăл ерсе.
Анчах леш тахçанах ăна маннă,
Пурăнать çак хĕрарăм йĕрсе.

Ялти пуçлăх ăна ĕçе чĕнчĕ,
Кайма хушрĕ ĕне фермине.
Пурăнма унта пур хурал пÿрчĕ, —
Пĕтерет çав ăна ÿркенни.

Пулайман вăл никамăн та кинĕ,
Ачине ÿстерет ют çĕрте.
Хăш чухне ун ăна курас килнĕ,
Каяймасть пăрахса сив пÿрте.