Хĕвелпе хĕмленет çуркунне,

Ăшшипе чĕрĕлет çутçанталăк.

Чечекпе эрешлет вăл тумне,

Ырлăхра савăнать вĕçен кайăк.

 

Çулсерен хитререх тăван ен

Çĕнĕлет чун юратнă тавралăх.

Илĕртет яланах ытамне,

Кăмăлтан уçăлма кунта лайăх.

 

Çу уявĕ мăнаçлăн янрать,

Çĕнтерỹ чĕрере асăнмалăх.

Сĕм вăрман чĕрĕлсе пуç таять,

Салтаксем пек патвар-çке юманлăх.

 

Пурнăçра ырă вăй çĕнтерет

Çĕкленме сăлтав пур халь пурин те.

Ăшăтать чĕрене çут тивлет,

Сар хĕвелĕн телейлĕ кулли пек.

Пĕтĕм çут тĕнче илемлĕ
Ылтăн кĕркунне.
Асамат кĕперĕ тĕслĕ
Тăхăнать тумне.

Мĕн тери чĕре сипетлĕ
Ун ытамĕнче.
Çут çанталăкăн çут пилĕ, —
Шеп ырлăхĕнче.

Тĕрлĕ çимĕçпе сăйлать вăл
Йăлт тивĕçтерсе.
Çĕкленет килĕшсе кăмăл
Ырлăхпа пĕрле.

Савăнар-и, савнă тусăм,
Савăк тивлетпе.
Пирĕн те кÿресчĕ усă
Чун илемĕпе.

Савнă Нимĕчкассинче 
Пурăнать ман хуняма. 
Ирхи хĕвел шевлипе 
Анне тухать урама. 

Вăл ярать сурăхсене 
Ялти пысăк кĕтÿне. 
Ырă кăмăллă анне 
Уçать кунта хăй чунне. 

Вăл тивĕçлĕ канура, 
Тăрăшать хуçалăхра. 
Савнă ачисен сумне 
Хывать хăйĕн тÿпине. 

Тимлĕх çитеймен чухне 
Каçарать вăл хĕрхенсе. 
Ÿстерет çапла чысне 
Витĕм кÿрсе чĕрене. 

Тавтапуç сана, анне, 
Çĕклентерен эс пире. 
Ялкăшать чунри хĕлхем, 
Санра пур чăн-чăн илем!

Çамрăклăх çеçкере
Сĕтеклентĕр-и?
Çултан-çул йăл илсе
Хÿхĕлентĕр-и?

Кăра çил витеймест
Çирĕп çеçкене.
Сивĕ тăм тивеймест
Селĕм илемне.

Çамрăклăх чунĕпе
Тĕреклентĕр-и?
Юрату хĕмĕпе
Эрешлентĕр-и?

Сивĕнми савнăран
Ырăлантăр чун.
Иксĕлмест нихăçан
Пархатарĕ ун.

Паллашрăмăр ташă каçĕнче, 
Лакрей паркĕ саншăн юмах пулчĕ: 
Хÿхĕмленчĕ ытларах тĕнче, 
Ырă кунне çепĕç туйăм тулчĕ. 

Килĕштертĕн пĕрре курнипех, 
Пăлханса савни пулма пикентĕн. 
Маншăн пултăн сар хĕвел пекех, 
Чуна сивĕ тунсăх иленсен те. 

Хавхалантăн хĕрÿ савнăран, 
Çывăх тăванла юлма тимлерĕн... 
Хавшак чунăм чурăс пулнăран 
Пÿрнĕ телее хамах сÿнтертĕм. 

Тарăн йĕр хăвартăн пурнăçра, 
Хумханса сана аса илетĕп. 
Сан чунра пур чи пысăк тупра, — 
Турă панă юрату илемĕ.