Хаваспах шкула утатăп 
Эпĕ лăпкă ирсерен.
Вĕрентекене куратăп —
Савăнатăп чĕререн.

Кăмăллăн класа кĕретĕп,
Вăл та васкаса кĕрет.
Урока хатĕрленетĕп —
Кашнинех çитет черет.

Вăл ăс-тăн парать пурне те —
Питĕ лайăх вĕрентет:
"Хăвăршăн пурнăç çулне те
Суйламашкăн пĕлĕр!” — тет.

— Калаçма, тĕрĕс çырма та,
Пит илемлĕ вулама,
Тарăннăн шухăшлама та,
Ăраскала палăртма.

— Ват çынна хисеплеме те,
Яланах ыр çын пулма.
Чăваш чĕлхине пĕлме те —
Юратма та упрама.

— Çут çанталăка курма та,
Чечек шăршине туйма,
Пур чĕрĕ чуна савма та,
Тăван ене мухтама…

Чунтанах эп хисеплетĕп
Хамăн вĕрентекене.
Ăнăçу, телей сĕнетĕп —
Ăна манмăп ĕмĕрне.

Унăн тепĕр енĕнче
Сĕм вăрман хÿтлĕх парать.

Çĕнелсех пырать ман ял:
Хăпараççĕ çурчĕсем,
Çĕкленет чунри вăй-хал —
Пултараççĕ çыннисем.

Хамăр ял çине пăхсан —
Мухтанмалăх чăн та пур.
Вăл ÿссе пырать пулсан,
Çыннисем унăн маттур.

Тикĕс шăвать пурăнăç:
Пĕрин çемье хушăнать,
Теприн хăйĕн савăнăç:
Çĕнĕ çурта вăл куçать.

Килĕшет мана ялтах:
Уçă сывлăш-çке тулта,
Тăвансем, туссем пайтах,
Çывăх юлташсем — шкулта.

Юрататăп ялăма,
Пурришĕн ăна тавах!
Ĕмĕр-ĕмĕр савăнма
Чечеклентĕр яланах!

Чи хаклă çын вăл çĕр çинче — 
Кашни ачийĕн чĕринче.
Пире кун-çул вăл парнелет —
Ыр пурнăç та телей пиллет.

Чи ырă çын вăл çĕр çинче —
Вăй-халĕ ун ачисенче.
Пĕрре те шеллемест хăйне —
Çÿлте тытать çемье чысне.

Чи чунлă çын вăл çĕр çинче —
Пире ÿстернĕ чĕр çинче.
Вĕренÿре, кашни ĕçре
Васкать вăл пулăшма пире.

Чи ĕçлĕ çын вăл çĕр çинче —
Пур ĕç ăнать ун аллинче.
Вăл ĕлкĕрет кирек ăçта,
Чăнах та тем тума ăста.

Чи савнă çын вăл çĕр çинче —
Чĕри ун аслă чунĕнче.
Пурин валли те ун çитет:
Ыр туйăм, ăш сăмах, тивлет.

Ун чапĕпе паян инçе.
Унпа чухне — чун çĕкленет,
Унпа чухне — çул кĕскелет.
Чи кирлĕ çын вăл çĕр çинче.

Чи чаплă çын вăл çĕр çинче —
Аннесĕр пит кичем тĕнче.
Унпа çеç кăмăлăм тулли,
Унпа çеç пурнăçăм тулли.