Ялăм ман – Сурăмхĕрри,

Пит илемлĕ-çке хайхи.

Тикĕс-тикĕс уй-хирсем,

Тарăн-тарăн çырмасем.

Юрласа юхать Кăшлав,

Уй-хирте тăрать шăв-шав.

Васкатать ĕçе тăри:

«Сухаласа акрăр-и?»

Пит ĕçчен ял-йышăм ман

Пур ĕçе те пуçласан.

Ĕç пĕтсен вара ялан

Савăнма пĕлет аван.

Тарават, хастар çынсем

Пурăнаççĕ çак ялта.

Ĕненместĕр-и çакна -  

Килсе курăр хăнана!

Кириллова Екатерина

Карайри вăтам шкул: 8-мĕш класс: 14 çул

«Савнă тăван ен – Красноармейски» номинаци

Кам-ха ирхине тăрса

Апат-çимĕç хатĕрлет?

Ăш ыйхăран вăратса

Пире апат çитерет?

 

Кам-ха пире юратса

Ачашласа ÿстерет?

Ырă тĕслĕх кăтартса

Хăй пек пулма вĕрентет?

 

Кам-ха пире саламлать

Уяв кунĕ ячĕпе?

Савăнсах парне парать –

Хитре çĕленĕ кĕпе?

 

Эпир лайăх вĕренсен

Камăн чунĕ савăнать?

«Пиллĕксем» илсе килсен

Камăн тути йăл кулать?

 

Пире çын тăвас тесе

Кам-ха пĕрмай кулянать?

Кунĕн-çĕрĕн ĕçлесе

Ачисемшĕн тăрăшать?

 

Кам-ха пирĕнпе ялан

Чунне уçса калаçать?

Савăнăç-инкек пулсан –

Йăлтах çурмалла пайлать?

 

Ку вăл – чи-чи хаклă çын,

Ман юратнă, çывăх çын.

Ку вăл – чи хитре анне –

Ăна манмăп ĕмĕрне.

Чĕререн савăнатăп санпа.

Сан пекки эпĕ урăх пĕлмес - 

Улăштармăп сана никампа.

Сывă пулччăр çĕнелнĕ ялсем,

Туслăха упракан ыр çынсем

Авалтан ÿсекен вăрмансем,

Тыр-пулпа ешерен уй-хирсем... 

Савнă ен, ман калассăм килет,
Ĕçÿсем сан пур хак пама!
Çыннусен ялан пултăр хисеп,
Вĕсемпе эс пултар мухтанма.

Кашни çын хăй хыççăн ырă ят хăварма тăрăшать, район ятне çĕклеме ĕмĕтленет. Вĕсен хушшинче учительсен тÿпи те пур. Манăн ырă ята тивĕçнĕ вĕрентекенсем çинчен çырас килет.
Упири пĕтĕмĕшле пĕлÿ паракан вăтам шкулта ятлă-сумлă учительсем нумай. Вĕсенчен пĕри – Галина Аркадьевна Васильева, ман юратнă пĕрремĕш вĕрентекен. Вăл илемлĕ пит-куçлă, хура çÿçлĕ, хăмăр куçлă, вăтам çулсенчи хĕр арăм. Галина Аркадьевна Анат Кушар ялĕнче кун çути курнă. Гавриловсен аслă ачи пулнă. çак çемье ял хушшинче ятлă-сумлă шутланать. Амăшĕ, Елизавета Павловна, аслă медсестра. ĕçри пултарулăхне кура вăл Чăваш Республикин тава тивĕçлĕ медицина ĕçченĕ ята тивĕçнĕ, ашшĕ - Аркадий Гаврилович -патшалăх служащийĕнче нумай çул ĕçленĕ. Пĕчĕк тĕпренчĕкĕ ырă та сывă çитĕнни вĕсене савăнăç кÿнĕ. Амăшĕ ачине мĕн пĕчĕкренех ырă çын пулма вĕрентсе ÿстернĕ. Ырă çыннăн пурте ырă пулмалла. Чи малтанах юратнă хĕрне хуть те мĕнле ĕçе те чунтан тăрăшса тума вĕрентнĕ. Наян çын ырă пулаймасть тенĕ. Хĕр çак сăмахсене ăша хывнă. çынна юрăхлă пулма тăрăшнă. Галина Аркадьевна вĕрентекен пулма ĕмĕтленнĕ.
Пысăк ĕмĕтпе пурăнаканскер Упири пĕтĕмĕшле пĕлÿ паракан вăтам шкула ăнăçлă пĕтернĕ хыççăн, алла аттестат илсен, И.Я. Яковлев ячĕллĕ педагогика институтне кĕçĕн классен уйрăмне вĕренме кĕрет. Тăван шкулта чухнех юрра-ташша юратнă хĕр кунта та хăйĕн пултарулăхĕпе пĕрле вĕренекенсене тĕлĕнтерет.

«Ватă çын – тăватă çын»:- теççĕ халăхра. çав тери ăслă каланă шухăш. Эпĕ те çак шăхăшпа килĕшетĕп. Ватă çынсем епле ăслă: ырă кăмăллă: чăтăмлă пулнинчен тĕлĕнетĕп. 
Манăн юратнă кукамай пур. Халĕ вăл Тусай ялĕнче пурăнать. Ăна Алексеева Зоя Васильевна тесе чĕнеççĕ. Хăй Мăн Шетмĕ тăрăхĕнче ÿссе çитĕннĕ. Ваçли Семенч йăхĕнчен тесен таврара пурте пĕлнĕ. Кукамайăн ашшĕ нумай хушă колхоза ертсе пынă. çичĕ ачаллă çемьере çитĕннĕскер: пĕчĕкренех ĕç патне кÿлĕннĕ. Аслисем пĕрин хыççăн тепри килтен туха-туха кайнă. Алла професси илме васканă. Ват кукамайăн пурне те тумалла пулнă. Кукамай пĕчĕкренех алсиш-чăлха çыхма маттур пулнă. Амăшĕ вара ăна хăйне пулăшакан та кирлĕ тесе малалла вĕренме яман. Ку самантсене кукамай куççуль витĕр аса илет. «Пурне те вĕрентме тăрăшрĕç: мана вара ал ĕçне ахаль те маттур тесе ямарĕç»:- тет.
Кĕçех вăрçă пуçланать. Ытти хĕрсем пекех кукамай вăрман касма каять: торф кăларнă çĕре те çитет... «Урасем çĕр каçиччен типсе те ĕлкĕрейместчĕç. Пысăк бараксенче пурăннă май ытти япаласене те типĕтейместĕмĕр»:- тет ĕç ветеранĕ. Шăпах çавăн чухне урасене упрайманни паян та аса илтерет ăна. «Урасем ман час-часах çывăраççĕ. çавăнпа ытларах утма тăрăшатăп эпĕ»:- тет хăй. Вăрçă çулĕсенче вăл колхозра бригадирăн помощникĕ пулса та ĕçлет. Ун чухне кашни пучахшăн ответ тытма лекнĕ. Нимĕнле тырра та уя хăварман. Пултарулăхне: хастарлăхне кура кукамая вăрçă вăхăтĕнчи хастарлăхшăн медаль парса чыслаççĕ.