Пирĕн пултарулăх - Каталог статей - Нестер Янкас ячĕллĕ пĕрлĕх

Капан тăватчĕç мучисем

Хӗрарӑмсем кунтӑк ҫакса

Акнӑ тырра ҫуран утса.

Пухнӑ ӑна алпа вырса,

Юлман пучах уйра выртса.

Йӗтем ҫинчен ҫерем касма,

Каяттӑмӑр ҫӗр-шыв типсен.

Уйра тыр-пул пулса ҫитсен,

Лавпа пуҫланӑ турттарма.

Йĕтем çине кĕлте пырсан,

Ăна хуратчĕç капана.

Туса пыма арҫын ӗҫне,

Ҫӑмӑл пулман ачасене.

Кайнӑ вӑрҫа вӑй питтисем,

Капан тӑватчӗҫ мучисем.

Сӗлӗ, ыраш, тулӑ капань,

— Пӗрре кӑна кунта пулман.

Кӗтӳ кайсассӑн ирхине,

Тухнӑ ял-йыш йӗтем ҫине.

Ҫаппуҫҫипе авӑн ҫапма,

Вӑхӑт пулман ача пӑхма.

Капан ҫинчи кӗлтесене,

Илсе хуратчӗҫ ҫӗр ҫине.

Вӑй-хал хурса ҫаппуҫҫипе,

Ҫапатчӗҫ авӑн кунӗпе.

Хӑшсем вара тӗшӗ тырра,

Хунӑ хӗвел питне сарса.

Кун тӑршшинче типсе ҫитсен,

Кӗнӗ пухса шырлӑх айне.

Варкӑш ҫилпе сӑвӑрттарса,

Тасатнӑ тырӑ имҫамран.

Ҫавра ала ҫине ярса,

Кӑларнӑ тырӑ тасатса.

Ҫав пурнӑҫа аса илсен,

Эп тӗлӗнетӗп вӗсенчен.

Епле ҫитернӗ вӑй-халне?!

Ӳстернӗ вӗт ачисене!

Çурăлсан çĕмĕрт çеçкийĕ

Эх, илемлӗ курӑнатчӗҫ

Тӑван ял урамӗсем.

Ҫуркунне шап-шур ларатчӗҫ,

Пахчари улмуҫҫисем.

Урамри ем-ешӗл курӑк,

Ҫаран евӗр курӑнать.

Вӑйӑра мӗн чухлӗ ҫамрӑк?..

Юмахри пек туйанать.

Ҫурӑлсан ҫӗмӗрт ҫеҫкийӗ,

Вӑййа тухнӑ пикесем.

Ян! кайсан "Урам ҫеммийӗ",

Пухӑннӑ яш-кӗрӗмсем!

Йӑлтӑр-йӑлтӑр Шетмӗ шывӗ:

—Шӑнкӑр-шӑнкӑр сас парать.

Вӑйӑри илемлӗ шавӗ,

Чунӑма савӑнтарать.

Вӑйӑ картине тӑрсассӑн,

Савнине алран тытса.

Эх, ташлаттӑмӑр хавассӑн!

Харӑссӑн ура тапса.

Купӑсне алран ямастчӗ,

Шур Картиш каччи—Кирилл.

Вӑйӑра ташлаттаратчӗ,

Ҫаврӑнаттӑмӑр "Кадриль".

Яланах пӗрле ташланӑ,

Юратса ялти хӗрне!

Вӑй хурса ӗçре тарланӑ,

Канӑҫа пĕлмен чӗре!

Ленька, Саньккӑ, Ваҫкӑ, Куҫкӑ,

Пулнӑ манӑн тантӑшсем.

Халӗ ӗнтӗ вӗсем ҫуккӑ,

Асӑмра ялан вӗсем.

Юратнӑ кӗтес/Ачасен пултарулăх конкурсĕ

Упи ялӗ — ман ҫуралнӑ ялӑм,
Ҫак кӗтес — юратнӑ вырӑн ман.
Унпала тек ҫӗкленет вӑй-халӑм,
Ун патнех чӗре туртать ялан.

Уйрӑмах ҫулла илемлӗ эсӗ —
Йывӑҫсем сип-симӗс ларнӑ чух.
Вӑлтапа Ҫавал хӗрне ҫитсессӗн...
Пуллисем выляҫ — ытарма ҫук!

Инҫех мар вӑрманӗ — савӑнмалӑх.
Чӑрӑшсем, хырсем темӗн чухлех...
Сывлама унта питех те лайӑх,
Калӑн эс: рая лекнӗ! тесех.

Упи ен — районӑн пӗр кӗтесӗ,
Ӳстеретӗн ӑслӑ ҫынсене...
Кунта пур писателĕ, поэчӗ —
Чӑвашра пӗлеҫҫӗ вӗсене.

Саламлатпӑр района эпир те —
Ҫитмӗл пилӗк ҫул ҫитнӗ ятпа.
Сӑвӑсем ҫыратпӑр каҫ та, ир те,
Туслашас тесе — райхаҫатпа.

Тăван кĕтес/Ачасен пултарулăхĕ

Ак чĕрĕлет тавралăх,
симĕсленет вăрман.
Татах куçать ачалăх
аяккарах манран.

Юрлать-ха асăнмалăх
ĕнер, паян, ыран.
Сăрт хыçĕнчи йăмралăх
хăв асунта тытсан.

Куçăм тулли пуянлăх
çуралнă ялăмра.
Пур та çав мухтанмалăх
юратнă вырăнпа.

Тулать, тулать тавралăх
янравлă юрăпа.
Савăнтарать тавралăх
чыслă, ĕçчен çынпа.

Аса илсемччĕ, тусăм,
çуралнă вырăна!
Час-час пулсамччĕ,тусăм,
тăван килте-çуртра.

Хлебнова Наталия
Карайри вăтам шкул, 7-мĕш класс, 13 çулта
«Савнă тăван ен – Красноармейски» номинаци

Юр пĕрчи/Ачасен пултарулăхĕ

Юр пĕрчийĕ çаврăнса:
Лăпкăн-лăпкăн ярăнса:
Çĕр çине вăл ÿкет.
Таврана илем кÿрет.

Шурă юр – хĕл палли:
Юр пĕрчи – ун парни.
Йăлтăркка та мерчен:
Ун кун-çулĕ черчен.

Вăйлă çил вĕрсен
Пин-пин юр пĕрчисем
Çавра çил ташшипе
Çаврăнаççĕ вĕсем.

Сар хĕвел йăл кулсан
Юр пĕрчи çутатать.
Ăшă кун пуçлансан
Шыв пулса çухалать.

Степанова Ольга
Карайри вăтам шкул: 7-мĕш класс: 13 çулта
«Савнă тăван ен – Красноармейски» номинаци