Пирĕн пултарулăх - Каталог статей - Нестер Янкас ячĕллĕ пĕрлĕх

Тавах/"Ачасен пултарулăхĕ" конкурса

Сар хĕвел пăхать ачашшăн,

Çутатать пирĕн çула.

Ăслă çын эпир пуласшăн

Çÿресе куллен шкула.

Çирĕп сывлăхлă пуласшăн –

Çырăнатпăр кружока.

Кашни кун аталанасшăн –

Тăрăшатпăр урокра.

Учительсене сунатпăр

Сывлăх та çитĕнÿсем.

Кăмăлтан эпир калатпăр:

«Ăнса пыччăр ĕçĕрсем».

Максим Степанов, 6б класс,

Красноармейски иккĕмĕш шкулĕ,

«Кăмăл» вĕренÿ пĕрлешĕвĕ

Ертÿçи – Михайлова З.П.

Пĕрремĕш учитель/"Ачасен пултарулăхĕ" конкурса

Пĕрремĕш учитель тухмасть асăмран,

Юратрăм ăна эпĕ пĕтĕм чунтан.

Вĕрентрĕ мана вăл çырма, вулама,

Хитре ÿкерме, калаçма, шутлама.

Пĕрремĕш учитель вăл чи пирвайхи,

Чи-чи кăмăлли те чи-чи лайăххи.

Чĕри ун пĕрмай ачасемшĕн çунать,

Тăван анне пек вăл пире юратать.

Вăл ырă, хисеплĕ, илемлĕ, хастар,

Ĕçчен, тăрăшуллă, чунпа та патвар.

Пире те хăй пек тăвассишĕн куллен

Вăйне те, халне те нихçан шеллемен.

Учителĕн ĕçĕ пĕртте çăмăл мар,

Анчах пархатарлă, хисепсĕр те мар.

Мĕн чухлĕ çынна парнелет хăй ăсне,

Пур ыр кăмăлне, туйăмне те чунне.

Мария Данилова, 6б класс,

Красноармейски иккĕмĕш шкулĕ,

«Кăмăл» вĕренÿ пĕрлешĕвĕ

Ертÿçи – Михайлова З.П.

Шкулта/"Ачасен пултарулăхĕ" конкурса

Кашни кунах шкула васкатăп,

Ăс-тăн пухатăп, вĕренетĕп.

Ирхи гимнастика тăватăп,

Сывлăхăма çирĕплететĕп.

Тантăшсемпе эп калаçатăп,

Килти ĕçе пăхса тухатăп,

Пурне те ырă кун сунатăп,

Учителе кĕтсе ларатăп.

Вĕрентекен класа кĕрсессĕн

Пурте ура çине тăраççĕ.

Ачасене ларма сĕнсессĕн

Шăпăрт кăна кĕрсе лараççĕ.

Пĕр харăссăн куçран пăхаççĕ.

Учитель сăмахне кĕтеççĕ.

Ун çепĕç сассине итлеççĕ,

Ăша хываççĕ, ăнланаççĕ.

Шкул пурнăçĕ ытла асамлă:

Пĕлÿ тĕнчи, ăсталăх çурчĕ –

Кунта йăлтах илемлĕ, чаплă,

Тăрăшса çеç ман вĕренесчĕ.

Кунта ман çывăх тусăмсем пур,

Кирек хăçан та пулăшаççĕ.

Учительсем те юнашар пур –

Мана анне пек юратаççĕ.

Хушма пĕлÿ илес тесессĕн –

Тем тĕрлĕ кружоксем ĕçлеççĕ.

Ташлас, юрлас, канас тесессĕн –

Тем тĕрлĕ уявсем иртеççĕ.

Шкулти хаваслă пурнăç тухмĕ

Ман асăмран вăл нихăçан та.

Вĕрентекен сăнарĕ юлĕ –

Эпир кирек ăçта пулсан та.

Кристина Лукина, 6б класс,

Красноармейски иккĕмĕш шкулĕ,

«Кăмăл» вĕренÿ пĕрлешĕвĕ

Ертÿçи – Михайлова З.П.

Тăван шкул/"Ачасен пултарулăхĕ" конкурса

Доска, компьютер, мел, пукан,

Сĕтел, проектор та экран –

Ку – шкул, пире ăс паракан,

Вĕрентекен, çын тăвакан.

Ку шкул вăл хăй пысăк çемье,

Учитель – иккĕмĕш анне.

Ун ачисем кунта нумай –

Пурне те юратать пĕр май.

Ача-пăча куллен чупать –

Шкула вăл питĕ юратать.

Кунта ăсталăха туптать,

Пуласлăха шанса тăрать.

Учитель лайăх вĕрентет,

Вăйне пĕрре те шеллемест.

Ăнланмасан – ăнлантарать,

Йывăр пулсассăн – пулăшать.

Шкул пĕтерсе тухса кайсан,

Кашни хăй вырăнне тупсан…

Çавах шкул асăмран тухмасть,

Вĕрентекен асран каймасть.

Кашни ача пурнăçĕнче,

Ун асĕнче те чĕринче

Юлать юратнă тăван шкул,

Пире пиллет вăл такăр çул.

Алексей Михайлов, 9б класс,

Красноармейски иккĕмĕш шкулĕ,

«Кăмăл» вĕренÿ пĕрлешĕвĕ

Ертÿçи – Михайлова З.П.

Учитель/"Ачасен пултарулăхĕ" конкурса

Учитель маншăн – хаклă çын,

Учитель маншăн – çывăх çын.

Куллен урок ăнлантарать,

Эп ăнлансассăн – савăнать.

Пире чунтан вăл юратать,

«Иккĕ» илсессĕн – кулянать.

Анне пекех вăл туйăнать –

Пĕрре пăхсах вăл ăнланать.

Учитель юнашар чухне

Чунра та лăпкă, çăмăл-çке.

Ун ыр сăмахĕ – чĕрере.

Сăнарĕ – куçăм умĕнче.

Павел Никифоров, 5б класс,

«Кăмăл» вĕренÿ пĕрлешĕвĕ,

Красноармейски иккĕмĕш шкулĕ

Ертÿçи – Михайлова З.П.