Пирĕн пултарулăх - Каталог статей - Нестер Янкас ячĕллĕ пĕрлĕх

Учительсем!/"Ачасен пултарулăхĕ" конкурса

Ырă чунлă та кăмăллă çынсем –

Иккĕмĕш анне пирĕншĕн вĕсем.

Чун-чĕререн тăрăшакан çынсем –

Шанчăклă та аслă юлташсем.

Тавтапуç сире, учительсем!

Аня Чернова, 8а класс,

Красноармейски иккĕмĕш шкулĕ

Ертÿçи – Михайлова З.П.

Юратнă учитель/"Ачасен пултарулăхĕ" конкурса

Зинаида Петровна Михайловăна хисеплесе

Чăн чăвашла калаçать,

Чăваш чĕлхи вĕрентет,

Пире чунтан юратать,

Ялан тăрăшса ĕçлет.

Вăл пурне те ăнланать,

Хăш чух шÿтлесе илет,

Вăл пурне те пулăшать,

Маттур çынсем пулăр тет.

Ырă чунлă вăл, ĕçчен,

Пĕрмаях хитре çÿрет.

Юратнă вĕрентекен,

Ăна тав тăвас килет.

Алексей Семенов, 8а класс,

Красноармейски иккĕмĕш шкулĕ

Ертÿçи – Михайлова З.П.

Пирĕн учитель/"Ачасен пултарулăхĕ" конкурса

Çур сăмахран ăнланакан,

Пире ăс-хакăл паракан,

Тĕрĕс çул-йĕр кăтартакан,

Пиртен ырă çын тăвакан…

Кам-ши вăл?

Вăл – пирĕн учитель.

Ăш сăмахпа ăшăтакан,

Ăш кулăпа саламлакан,

Ырми-канми тăрăшакан,

Вĕренÿре пулăшакан…

Кам-ши вăл?

Вăл – пирĕн учитель.

Пуриншĕн те кулянакан,

Пуриншĕн те савăнакан,

Пурне те тĕрĕс хаклакан,

Пурне те ырă сунакан…

Кам-ши вăл?

Вăл – пирĕн учитель.

Эпир пурте юратакан,

Чунра ыр йĕр хăваракан,

Нихçан та асăмран тухман,

Анне пекех туйăнакан…

Кам-ши вăл?

Вăл – пирĕн учитель.

Анжела Миронова, 8а класс,

«Кăмăл» вĕренÿ пĕрлешĕвĕ,

Красноармейски иккĕмĕш шкулĕ.

Ертÿçи - Михайлова З.П.

Ман кукамай/"Ачасен пултарулăхĕ" конкурса

Ман юратнă кукамай

Ватăлать çул иртнĕ май.

Анчах чунĕ çамрăках,

Çавăншăн ăна тавах.

Кукамайăм, кукамай!

Тунсăхлатăп эп пĕрмай.

Сана питĕ хисеплетĕп,

Килессе чунтан кĕтетĕп.

Хĕрĕх тватă çул шкулта

Вĕрентекенре ĕçлерĕн.

Ăслă çын çак тапхăрта

Пит нумай эс хатĕрлерĕн.

Эс вĕрентнĕ ачасем

Нихăçан сана манмаççĕ.

Уяв ячĕпе вĕсем

Салам хучĕсем яраççĕ.

Кукамай, эс ан кулян

Çулусем иртсе пынишĕн.

Эсĕ чунупа пуян –

Хĕпĕрте хăв телейлишĕн.

Эс пурришĕн савăнатăп,

Сан умра пуçа таятăп:

Пархатарлă ĕçÿсемшĕн,

Пурăнма пехил панишĕн.

Сана эпĕ юрататăп,

Ăраскал, телей сунатăп.

Сывлăху сан çирĕп пултăр,

Ĕмĕрÿ сан вăрăм пултăр.

Семенова Кристина, 8а класс,

«Кăмăл» вĕренÿ пĕрлешĕвĕ,

Красноармейски иккĕмĕш шкулĕ.

Ертÿçи - Михайлова З.П.

Вĕрентекен/"Ачасен пултарулăхĕ" конкурса

Пĕрремĕш хут ача шкула килет,

Пĕрремĕш хутчен вăл класа кĕрет,

Пĕрремĕш учитель савăнса пăхать,

Пĕлÿ кунĕпе ăшшăн саламлать.

Хаваслă туйăм çуралать шкулта:

Кунта юлташсем, учитель умра –

Калать вăл, калать, кăшт кулса илет,

Ун ырă сăн-пичĕ пире килĕшет.

Пăхать вĕрентекен, пурне те сăнать,

Ун çепĕç сасси чуна ăшăтать.

Вăл пур ачана та ăс-хакăл парать.

Вăл пур ачана та пĕр пек юратать.

Анне пек сăпай вăл, анне пек ĕçчен,

Ыр çын тăвасшăн çунать вăл пиртен.

Кашнин валлиех ăш сăмахĕ çитет.

Куллен пирĕнпе тăрăшса вăл ĕçлет.

Сăмахĕ ун витĕмлĕ, тĕрĕс, паха.

Чĕрийĕ ун сисĕмлĕ, пуян, таса.

Таланчĕ ун пысăк, ĕмĕчĕ çутă –

Пуриншĕн те вăл хаклă, чыслă, ырă.

Нимпе виçме çук ун сумлă ĕçне,

Нимле сăмахпа тав туса пĕтерме:

Ун çутă сăнарĕ юлать чĕрере,

Ун ăслă сăмахĕ манпа – ĕмĕре.

Марков Николай, 9б класс,                                        
«Кăмăл» вĕренÿ пĕрлешĕвĕ,Красноармейски иккĕмĕш шкулĕ
Ертÿçи – Михайлова З.П.