Пирĕн пултарулăх - Каталог статей - Нестер Янкас ячĕллĕ пĕрлĕх

Куртăн эсĕ çут тĕнче

Çурхи кун илемĕнче,

Уйриçурт ял варринче

Униçĕмсен çемйинче

Куртăн эсĕ çут тĕнче.

Ас тăватăп-ха сана,

Хастар йĕкĕтчĕ, ара.

Чун юратнă мăшăрна,

Эс тĕл пултăн райпора.

Тур пилленĕ сывлăхпа,

Аçу панă ăс-тăнпа,

Халь утатăн пит патвар

Мăшăрупа юнашар.

Пурнăçу пырать кал-кал,

Пулман нихăçан кахал.

Эс ÿстернĕ ывăлна,

Хывнă вăл йăлтах хăвна!

Çивĕч каччă ăс-тăнран,

Юлмасть вăл та Çерушран!

Мухтанма сăлтавĕ пур,

Кукăшсем пекех маттур!

Аллă çул вăл - нумай мар,

Шутласан – сахал та мар.

Манма çук мĕн курнине –

Хăв чăтса ирттернине…

Тăванусем – чун ăшши,

Эх, хитре юрри-ташши.

Пурăнмашкăн 100 çулне.

Халаллатпăр сывлăхне!

Шур халатлă пикесем

Шур халатлă пикесем –

Пирĕн сывлăх хуçисем!

Ура çине тăриччен,

Куç илмерĕр ман çинчен.

Шур халатлă пикесем –

Канăçа çухатнисем!

Тимлесе хĕрÿ ĕçре –

Парăнмастăр чир-чĕре!

Шур халатлă пикесем –

Çурхи кун илемĕсем!

Çутă тĕнче шевлине,

Парнелетĕр çынсене!

Шур халатлă пикесем-

Юрă-ташă ăстисем.

Çÿресе кану çуртне,

Кăтартатăр концертне.

Шур халатлă пикесем –

Мухтава тивĕçлисем!

Манас çук нихçан сире.

Сывлăх панăшăн пире!

Салтак пек хуралта

Чирлĕ çын асапне эс курсан,
Хăвăртрах сиплемешкĕн васкан.
Хăш чухне канăçа çухатса,
Вилĕмрен хăваратăн çăлса.

Илсе килчĕç, çапла, сĕм каçпа,
Чирлĕ ватă выртать ахлатса.
Суранне пăхма йывăр куçпа –
Эс сиплерĕн ăна пит ăста!

Чун-чĕре ăшшипе сиплесе,
Сывататăн çынна чир-чĕртен.
Кун каçа вăй хурса, тимлесе,
Вĕри тар юхтаран сăн-питрен.

Суйласа илнĕ чух çак ĕçе
Эс каларăн: «Эп тивĕç…» тесе.
Çирĕп тыт яланах сăмахна,
Халăх манмĕ вара ыр ятна!

Тухтăр ĕçĕ, пачах çăмăл мар,
Çын шăпийĕ ялан – сан алра.
Салтак пек хуралта эс тăран,
Телейна çакăнта эс куран.

Хисеплеççĕ сана чирлисем,
Юратаççĕ ĕçре тусусем!
Çак йышра пĕр чĕлхе эс тупни –
Пур-ши урăх унтан та хакли?..

Телей курăп тенĕччĕ

Çĕпĕр çĕрĕ çывăх мар та,

Çитсе килме çăмăл мар.

Пирĕн тăвансем аякра та,

Куллен курас çĕрте мар.

Йĕтĕн акса пир тĕртрĕм те,

Тутăр турăм тĕрлеме.

Хам пĕвĕме ÿстертĕм те,

Çичĕ ютра тĕмсĕлме.

Атте панă лашине те,

Кÿлсе çÿрес тенĕччĕ.

Çичĕ ютра тĕпленсе те,

Телей курăп тенĕччĕ.

Йĕлме касрăм, ким турăм та,

Мăн шыв тăрăх çÿреме.

Апай мана çуратнă та,

Тĕнче тăрăх çÿреме.

Аçу-аннÿ пилленĕ ăраскал

Нимĕчкассийĕ - эс çуралнă ял,

Юбилей сан çитрĕ раштавра кăçал.

Ăс-тăнран çивĕч, иксĕлми вăй-хал –

Аçупа аннÿ пилленĕ ăраскал.

Кукаçу енчен - Çеруш йăхĕнчен,

Аслаçу енчен – Майреç таврашĕнчен.

Несĕлсен ятне сÿнмешкĕн ан пар,

Кĕрнеклĕ пултăр ĕмĕрех çак тымар!

Усмашкăн пуçна сăлтавĕ çук сан,

Хăв чысна яланах çÿлте эс тытан.

Пурнăç çулĕпе утатăн хастар,

Чĕрÿ çумĕнче хĕм сапать шĕл-кăвар!

Хурçă утна алăран яманран.

Çитмен кĕтес çук-тăр Тăван çĕр-шывра?

Тус-тăванна чĕререн савнăран,

Санпа курнăçап тăтăшах Алманчра.

Ĕмĕр сакки сан пултăр сарлака,

Тăнăç пурнăçу – кĕленче пек яка.

Çемье хунавĕ тата кил ăшши –

Ялан пĕрле пултăр юрри те ташши!