Паян кунĕ пит илемлĕ,
Парнене памашкăн меллĕ.
Кăмăл туса сана чунран,
Çыратăп сăвă хам ятран.

Сăн-пит çинче çиçет куллу,
Хаваслă туйăм вăратса.
Чунра сан ăшă кăмăлу,
Ĕçе тăватăн юратса.

Ача садне ĕçе çÿрен,
Вăхăт иртни те сисĕнмест.
Хăв ачуна ялан кĕтен,
Пĕрле чухне чун хĕпĕртет.

Пуçна усмастăн, чиперех!
Юрлан, ташлан эс, çамрăк пек.
Çапла пул ĕмĕр-ĕмĕрех!
Пурнăçу пултăр чечек пек!

Çуралнă кунĕ сан паян,
Алла тытам-ха эп баян.
Юрла, ташла эс, савăнтар,
Эс пулнă яланах патвар!

Нарăс уйăхĕ, 2009 çул.

Пичетре вăй-хал хуратăн,
Вăтăр пилĕк çул таран.
Ятлă-сумлă ĕç тăватăн,
Çивĕч эсĕ ăс-тăнран.

Сăн илет район хаçачĕ,
Вулакан ăна пĕлет.
- Чăваш культурăн ĕçченĕ,-
Ята тивĕç пултăн эс.

Кулăш лаççинче тимлетĕн,
Шÿт туса çыран чылай.
Юрăсем, ав, кĕвĕлетĕн,
Мухтанап санпа пĕрмай.

«Вăййа тухрĕ сарă каччă»,-
Кĕвĕленĕччĕ пирвай.
Çирĕмрен халь иртрĕ шучĕ,-
Çырăн-ха тата нумай!

Пичетре кун çути курчĕç,
Сăвă-юрă пуххисем.
Малашне те вĕсем тухĕç -
Савăнтарĕç çĕннисем!

Нестер Янкаса та çывăх,
Лауреачĕ пулнăран.
Тур пани çумра сан - çынлăх,
Ыр ятпа эс пурăнан.

Хушма хушаматне илтĕн,
Халĕ эс – Иван Чураль.
Пуллине тытма вĕрентĕн.
Таврăнмастăн-çке ахаль.

Шахмăтла вылятăн тăнлă,
Çĕнтерÿçĕ - ахаль мар!
Хурт-хăмăрĕпе те туслă,-
Кăрчамийĕ кунĕ мар!

Çирĕп сан çемье тĕввийĕ.
Савăнан мăнуксемпе.
Янăрать юрри-кĕввийĕ
Тăвансем пухăннипе.

Утмăл çул сана кам парĕ?
Çăмăл шăм-шакпа çÿрен.
Юлташсем савса чысларĕç,
Юбилейĕ çитнĕрен!

Çу уйăхĕ, 2009 çул.

Çуркунне униче картинче,
Çĕмĕртсем шап-шурах çеçкере.
Эх, епле вăл хитре униче!
Тĕл пулсассăн кунта ик чĕре!

Шăпчăксем çулçăсем хушшинче
Шăратаççĕ çурхи кĕвĕсем.
Шурă çĕмĕрт çеçки айĕнче
Янăраççĕ хитре юрăсем.

Сĕрме купăс çĕклет кăмăла,
Савнă тусăм, кĕтетĕп сана.
Килĕшетĕп пулсассăн, кала –
Юрату шевлине халалла!

Ытарма çук çурхи илеме –
Тусăмсем тăхăнсан шÿлкеме.
Çамрăк чух эпир пурте хитре,
Çутă уйăх вылять сăн-питре!