Гурий Дубров пултарулăхĕ - Пирĕн пултарулăх - Каталог статей

Салтак пек хуралта

Чирлĕ çын асапне эс курсан,
Хăвăртрах сиплемешкĕн васкан.
Хăш чухне канăçа çухатса,
Вилĕмрен хăваратăн çăлса.

Илсе килчĕç, çапла, сĕм каçпа,
Чирлĕ ватă выртать ахлатса.
Суранне пăхма йывăр куçпа –
Эс сиплерĕн ăна пит ăста!

Чун-чĕре ăшшипе сиплесе,
Сывататăн çынна чир-чĕртен.
Кун каçа вăй хурса, тимлесе,
Вĕри тар юхтаран сăн-питрен.

Суйласа илнĕ чух çак ĕçе
Эс каларăн: «Эп тивĕç…» тесе.
Çирĕп тыт яланах сăмахна,
Халăх манмĕ вара ыр ятна!

Тухтăр ĕçĕ, пачах çăмăл мар,
Çын шăпийĕ ялан – сан алра.
Салтак пек хуралта эс тăран,
Телейна çакăнта эс куран.

Хисеплеççĕ сана чирлисем,
Юратаççĕ ĕçре тусусем!
Çак йышра пĕр чĕлхе эс тупни –
Пур-ши урăх унтан та хакли?..

Телей курăп тенĕччĕ

Çĕпĕр çĕрĕ çывăх мар та,

Çитсе килме çăмăл мар.

Пирĕн тăвансем аякра та,

Куллен курас çĕрте мар.

Йĕтĕн акса пир тĕртрĕм те,

Тутăр турăм тĕрлеме.

Хам пĕвĕме ÿстертĕм те,

Çичĕ ютра тĕмсĕлме.

Атте панă лашине те,

Кÿлсе çÿрес тенĕччĕ.

Çичĕ ютра тĕпленсе те,

Телей курăп тенĕччĕ.

Йĕлме касрăм, ким турăм та,

Мăн шыв тăрăх çÿреме.

Апай мана çуратнă та,

Тĕнче тăрăх çÿреме.

Аçу-аннÿ пилленĕ ăраскал

Нимĕчкассийĕ - эс çуралнă ял,

Юбилей сан çитрĕ раштавра кăçал.

Ăс-тăнран çивĕч, иксĕлми вăй-хал –

Аçупа аннÿ пилленĕ ăраскал.

Кукаçу енчен - Çеруш йăхĕнчен,

Аслаçу енчен – Майреç таврашĕнчен.

Несĕлсен ятне сÿнмешкĕн ан пар,

Кĕрнеклĕ пултăр ĕмĕрех çак тымар!

Усмашкăн пуçна сăлтавĕ çук сан,

Хăв чысна яланах çÿлте эс тытан.

Пурнăç çулĕпе утатăн хастар,

Чĕрÿ çумĕнче хĕм сапать шĕл-кăвар!

Хурçă утна алăран яманран.

Çитмен кĕтес çук-тăр Тăван çĕр-шывра?

Тус-тăванна чĕререн савнăран,

Санпа курнăçап тăтăшах Алманчра.

Ĕмĕр сакки сан пултăр сарлака,

Тăнăç пурнăçу – кĕленче пек яка.

Çемье хунавĕ тата кил ăшши –

Ялан пĕрле пултăр юрри те ташши!

Чечек пек илемлĕ пикесем

Чечек пек илемлĕ пикесем –
Урологири медсестрасем.
Кăмăллă, ăш пиллĕ ĕçченсем –
Чăн та, мухтава тивĕçлисем!

Çапла пулăр яланах вăр-вар,
Чĕрере ан сÿнтĕр шĕл-кăвар!
Ырлăх-сывлăх, пархатар сире –
Çирĕп сывлăх панăшăн пире!

Ĕмĕр сакки пултăр сарлака –
Чирлисемшĕн мĕн тери паха!
Çакна асра тытăр, тусăмсем!
Хаклăран та хаклă тухтăрсем!

Çуркунне пулать-и е хĕлле –
Халăхпа ялан эсир пĕрле.
Сиплемешкĕн хатĕр çынсене –
Чыс, мухтав сывлăх хуçисене!
2004 çул, çу уйăхĕ.

Кĕçĕнни эс пултăн çемьере

Сар хĕвеллĕ ăшă çуркунне,

Кайăксем юрлатчĕç юррине.

Анне хăйĕн кĕçĕн ывăлне,

Парнелерĕ пурнăç çеçкине.

Анăçра алхасрĕ вут-кăвар,

Халăх юнĕ юхрĕ сахал мар.

Çамрăк вăхăт – вăрçă çулĕсем…

Ахальтен юхман çав куççульсем!

Астумастăн ĕнтĕ аттене,

Тăлăха эс юлтăн пĕчĕклех.

Йывăр пурнăç килчĕ аннене,

Вăл пире ÿстерчĕ пĕчченех.

Кĕçĕнни эс пултăн çемьере,

Юратсах пăхаттăмăр сана.

Астăватни? Лекнĕччĕ пĕрре -

Каçарсам эс уншăн халь мана!

Пурнăç çулĕ пулчĕ такăр мар,

Сахал мар юхтарнă вĕри тар!

Ачаран вăй илнĕ хăватпа,

Виличчен пурнасчĕ ыр ятпа!

Ĕнтĕ халĕ çитрĕн утмăла,

Çулĕсем шăваççĕ малалла.

Ватăлтăм, тесе эс ан кала,

Кам-ха сана парĕ çак çула?

Савăнмалăх пур сан сăлтавсем…

Ав, мĕн чуль чупаççĕ мăнуксем!?

Эп вара сунап çултан-çула

Вăй-хăват хушса пыр малалла.

2003 çул, пуш уйăхĕн 17-мĕшĕ.