Ылтăн-кĕмĕл карассем, 
Çаклатаççĕ пулăçсем. 
Пулăран пуян шывсем — 
Çирĕм ытла йышĕсем. 

Кÿлĕре ĕрчекенсем — 
Вăтăрсемпе ăтăрсем. 
Куянсемпе тилĕсем — 
Тайгара вăй илнисем. 

Çĕрĕ пуян вăрманпа —
Вун икĕ пин лаптăкра. 
Хырпа чăрăш, пихтăсем, 
Йăрăс вуллă хурăнсем. 

Хулари пек урамсем,
Пилĕк хутлă çурчĕсем, 
Асфальт сарнă урамне, 
Çĕклет ялăн илемне. 

Пайсупинра çуралса ÿснĕ паттăр ентешĕмĕре — Давид Максимович Максимова

Раман Еккĕмч Петĕрне,
Полици полковникне 
Эп тĕл пултăм Тюменьре, 
Туйрăм ăшă кăмăлне. 

— Пĕлес килет сир(ĕ)н çинчен,
Ыйтрăм эпĕ Петĕртен. 
— Хавас калаçма ирччен, — 
Епле пурăнать Трак ен? 

Çĕпĕре Тавит кукка
Вăрçăччен килнĕ куçса. 
Çуртне-йĕрне çавăрса 
Тымар янă Канашра. 

Хĕрĕх пĕрремĕш çулта
Куккана илеç вăрçа. 
Çĕпĕр дивизийĕнче — 
Хăюллисен йышĕнче. 

Чăтăм-тÿсĕм çитерсе
Аркатаççĕ нимĕçе. 
Вĕсен шанăç-ĕмĕтне 
Çунтараççĕ вут-хĕмпе. 

1941 çулта Мускав хулине хÿтĕленĕ Çĕпĕр паттăрĕсене асра тытса

Çĕпĕр дивизийĕ çинчен
Эпĕ илтнĕ сахал мар. 
Тюмень хулине çитсен 
Савăнтарчĕ çĕн хыпар. 

* * * 

Иртнĕ вăрçă тухнă çул 
Шутсăр сивĕ пулчĕ хĕл. 
Нимĕç пĕр кĕтмен çĕртен 
Çитрĕ Мускав çывăхне. 

Хĕл варринчи хаяр çил
Хуптĕрлерĕ нимĕçе. 
Тăм илсессĕн урине 
Хывса печĕ аттине. 

— Халĕ пире çăмăл мар, — 
Терĕç çарăн çыннисем. 
Тĕп хулана хăтарар — 
Çитрĕç Çĕпĕр енчисем. 

Çĕпĕр дивизи çитсен—
Хĕм кăларчĕç паттăрсем. 
Çирĕп пирĕн салтаксем — 
Çĕпĕрте тĕпленнисем. 

Çак дивизи йышĕнче 
Çапăçнă пир(ĕ)н ентешсем. 
Генералăн аллинчен 
Илнĕ орден, медальсем. 

Мухтанатпăр вĕсемпе,
Вăрçăри паттăрсемпе. 
Уйрăлсан та пирĕнтен 
Вĕсем тухмĕç чĕререн!

Çĕпĕр урлă çул выртать,
Тĕрлĕ енлĕ çын утать: 
Ссыльнăйсемпе купсасем, 
Çĕн çĕре каякансем. 

Çĕр айĕнчи пурлăхпа,—
Çывăх Менделеевпа. 
Ахальтен мар патша та 
Çитсе курнă çакăнта. 

Çĕпĕр çĕрĕ — пуян çĕр —
Нефчĕ, газĕ, сĕм вăрман. 
Вăй илеççĕ хуласем, 
Халăх пурăнать аван. 

"Сенкер çулăм" — газ тухать,
Тĕнчипех вăл саланать. 
Пăрăх тăрăх нефть юхать, 
Çĕрĕм-шывăм вăй хушать. 

Хапсăнатчĕç çак çĕре,
Анăçран та тухăçран. 
Ун хуçи пирĕн пĕрре — 
Раççейпе эс ан çыхлан!

Макар мучи тесе чĕнеттĕм
Ялти чи сумлă ватăна.
Вĕсем патне кайса çÿреттĕм,
Татса параттăм вутă та.

Çурт çумĕнчи илемлĕ сачĕ
Ларатчĕ капăр тумĕпе.
Çуркуннепе — шур шупăрпаччĕ,
Кĕрпе — сăйлатчĕ улмипе.

Сад çуммипе çырма юхатчĕ, —
Илет хăват Çÿреметрен.
Макар мучи мунча хутатчĕ,
Шывне йăтатчĕ пĕверен.

Макар мучин хура мунчаччĕ, —
Пире вăрах вăл кĕттермен.
Кашни эрнеренех хутатчĕ,
Хаклă вутта та хĕрхенмен.

Черечĕпе мунча хутатчĕç,
Вутти-шанкийĕ çитменрен.
Çÿремете вутта çÿретчĕç —
Каç пулттипе е ирсерен.

Нимĕç вăрçи асаплантарчĕ,
Нихçан тухмасть вăл чĕререн.
Макар мучин мунча хăвачĕ
Çăлса хăварчĕ инкекрен.

Тавах, мучи, хисеплĕ ватă,
Сана илеймĕн ытама.
Хушăмăрта эс çук пулсан та,
Çырса хуратăп сан ятна.