Пирĕн пултарулăх - Каталог статей - Нестер Янкас ячĕллĕ пĕрлĕх

Çурхи ăшă çумăр çурĕ

Чĕвĕлти чĕкеçĕ вĕçрĕ,

Шурă пĕлĕт айĕнче.

Хуларан яш каччă çитрĕ,

Хĕр савни ытамĕнче.

Хушса юрламалли:

Çурхи ăшă çумăр çурĕ

Кăвак шуçăм киличчен.

Ыталарĕ те чуп турĕ,

Хĕре каччă тутинчен.

Чечекри çăка ал пачĕ,

Ыр сунса çамрăксене.

Пыл чечекĕсене сарчĕ,

Хÿшĕ турĕ вĕсенчен.

Хушса юрламалли.

Ир енне çуталчĕ пĕлĕт,

Хĕвел тухрĕ ярăнса.

Çитрĕ, тейĕн, кĕтнĕ ĕмĕт,

Каччи ячĕ ăсатса.

Хушса юрламалли.

«Çеçпĕл» пахчинче çунат сараççĕ

Юр кайса пĕтсессĕн çурăлаççĕ,
Пирвайхи ем-ешĕл çеçпĕлсем.
«Çеçпĕл» садĕнче çунат сараççĕ,
Тур пилленĕ «çеçпĕл çеçкисем».

Пархатарлă, сумлă ĕç тăватăр,
Куллен эсир, хаклă тусăмсем!
Çамрăк ăрăва вăй-хал паратăр,
Вăрăм пулччăр пурнăç çулĕсем!

Çăмăл мар сире, паллах, туятпăр,
Çакă арăш-пирĕш пурнăçра.
Шанчăка пĕрех, ав, çухатмастăр,
Ăнăçу сунатпăр пурсăра!

Юбилей паян сан, «Çеçпĕл» сачĕ,
Вунă пиллĕк эсĕ тултаран.
Çеçкÿне санне сĕткен хушасчĕ,
Çирĕп пул эс ĕмĕр тымартан!

2002 çул, çу уйăхĕн 16-мĕшĕ.

Ăнăçу сан пултăрах…

Çитмĕл пиллĕк çул тултартăн,

Т(ă)рак енĕн хыпарçи.

Чыс, хисеп илме пултартăн,

Чăнахах «халăх тарçи».

Юратса сана вулаççĕ,

Мĕн пур ял ĕçченĕсем.

Хаваспах халь çырăнаççĕ,

Хăвăн çывăх тусусем.

Эх, епле вĕсем пит йышлă!

Мухтанатăн вĕсемпе.

Ĕçтешсем те, ав, сăпайлă,

Калаçаççĕ çынсемпе.

Конкурса та хутшăнатăн,

Çĕнтерÿçĕ - яланах!

Ăс-тăнпа малта пыратăн,

Ăнăçу сан пултăрах!

2010 çулхи мартăн 6-мĕшĕ.

Манас марччĕ

Тăван ялăм ыйха путнă,

Ĕçлесе ĕшеннипе.

Уйăх çутипеле утнă

Хуралçă тункăрмипе*.

Хурал тукмаккийĕ,- тетчĕç,

Çитнĕ вăл килтен-киле.

Пĕр ĕç кунĕпе чыслатчĕç,

Сыхă тăнăшăн çĕрле.

Яланах хурала тухнă,

Ÿркенсе, пăхса тăман.

Ачаран ĕçе юратнă,

Нихăçан алла усман.

Колхоз çурт-йĕрне сыхланă,

Сарăмсăр вут-кăвартан.

Халăх пурлăхне упранă,

Выçă вăрă-хурахран.

Ял ĕçченĕн хатĕр пулнă,

Шыв лахханĕ алăкра.

Хăйăрне те меллĕ хунă,-

Инкек тăтăр аякра.

Пурăннă ял-йышăм мирлĕ,

Вăрçăнса курман нихçан.

Çамрăк ăрăва вăл кирлĕ,-

Пурăнма пĕлсен аван.

Ваттисем пире вĕрентнĕ,

Пурнăçа тытса пыма.

Нушине тÿссе ирттернĕ,-

Манас марччĕ тав тума!

------------------------------------------

*Тункăрма – инкек-синкек пулнине систермелли хатĕр

Хурал пÿрчĕ

Хурал пÿрчĕ пурччĕ,

Пирĕн ялăн та.

Пушартан сыхлатчĕ,

Вăл кунран-куна!

Вĕт-шакăр çÿретчĕ,

Çак ăшă çурта.

Юмах юптаратчĕç

Ваттисем кунта.

Канмалли çурт пулнă,

Ял ĕçченĕсен.

Ал ĕçне те тунă,

Çакăнта вĕсем.

Йышлăн пухăнатчĕç,

Хăш чух çамрăксем.

Кил тĕлне манатчĕç,

Шуçăм киличчен.

Хĕл каçĕ иртетчĕ

Çулран-çул çапла.

Асăмра çеç юлчĕ,

Халь – юмах кăна.

Клуб е вулав çурчĕ -

Пирĕн ял курман.

Çук тек хурал пÿрчĕ -

Каймасть ман асран.