Виç вăй-мĕн тупăшнă яланлăх.
Пĕрремĕш парăнать пуянлăх.
Унтан илем калле чакать.
Пурне те çĕнтерет... сăпайлăх.

Вăхăт теп, тархасшăн, ан васка,
Пурнăç илемне курса юлар кăшт.
Çук, васкать. Ак уçăлчĕ лавкка,
Çĕнĕ супермаркет, гипермаркет...

Пурте сутуçсем пулса тăрсан
Пурлăх тăваканĕ кам пулать-ши?
Тĕрлĕ халăх килнĕ Кавказран,
Шарт çапать ик аллине чăвашĕ.

Тĕлĕнсе Çĕрпÿ пасарĕнчен
Шелепи мучи çырсаччĕ сăвă,
Ĕлĕк аслă пулнă çут тĕнче
Паянхи суту-илÿшĕн тăвăр.

Мĕн шыратăн — çийĕнчех тупан,
Ку туллилĕх пирĕншĕн, тен, пушлăх?
Поэта та ав йĕрлет хыçран
Хăйне хăй сутса ярас хăрушлăх.

Ан васка, пикеçĕм, ан васка,
Килелле утмашкăн ан васка.
Чĕрери калас сăмахăма
Эп ĕлкĕреймерĕм калама, –
Ан васка.

Ан васка, савниçĕм, ан васка,
Алăкна уçмашкăн ан васка.
Тепре çеç сăнна пăхса илем,
Кайăк пек çунатланса çÿрем, –
Ан васка.

Ан васкаччĕ, чунăм, ан васка,
Сывă пул темешкĕн ан васка.
Санпалах пуласшăн-çке чĕрем,
Саншăн çеç вăл тапĕ ĕмĕрех, –
Ан васка.

Хăй килне пырса пăхрĕ тет амăшĕн чунĕ.
Мăрьере тĕтĕм çук, кантăкра çутă çук.
Хулана ларса кайрĕ тет амăшĕн чунĕ
Каçхине, пуйăсра вырăнсем пушă чух.

Ачисем патне çитрĕ тет амăшĕн чунĕ,
Итлесе тăчĕ тет пĕр кана алăкран.
Куççульпех йĕрсе ячĕ тет амăшĕн чунĕ
Хваттерте ун чĕлхи, ун сăмахĕ çукран.

Учителĕн чĕри пит аслă теççĕ,
Кашни вĕренекен валли унта
Пур юрату, пур ăшă туйăм теççĕ, –
Атте-анне пекех вăл туйăнать.

Учителĕн ăс-тăнĕ çивĕч теççĕ,
Пурин валли те пĕлĕвĕ çитет.
Ăçтан тухать ун чухлĕ ăсĕ теççĕ, –
Аталанса та хутшăнсах пырать.

Учителĕн чĕлхи пит çепĕç теççĕ,
Пурне те йăпатма хевти çитет.
Ун пек чĕлхе ăна кам панă теççĕ, –
Вăл чĕлхене анне çеç парнелет.

Вĕрентекенĕн чунĕ ырă теççĕ:
Вăл çывăх тус-юлташ вырăнĕнче.
Ăçтан тухать ыр кăмăлĕ ун теççĕ, –
Ăш пиллĕ чун-чĕреллĕ пулнинчен.

Учитель вăл пит чăтăмлă çын теççĕ:
Тем тĕрлĕ ачана та вĕрентет.
Ăстан тухать-ши ун вăй-халĕ теççĕ, –
Чунне парса ырми-канми ĕçлет.

Учителĕн таланчĕ пысăк теççĕ:
Ташлать, юрлать те, сăвă та çырать.
Çакна пурне те Турă панă теççĕ, –
Маттур вăл, тем тума та пултарать.