Çичĕ теçетке тултартăн, 
Нарăс уйăх вĕçĕнче. 
Купăсна алран ямастăн, 
Пур тăвану хушшинче. 

Сан сассу илемлĕ, уçă, — 
Шăпчăкран та кая мар. 
Эп калам сана яр уççăн, 
Артистран та кая мар. 

Пурнăç кăшăлĕ сан çирĕп, 
Эс ăна ванма ан пар. 
Мăшăрпа пурнатăн ирĕк, 
Мăнуксем, ав, юнашар. 

Пурнăçăн илемлĕ тĕсĕ — 
Чун юратнă мăшăру. 
Вăрăм пултăр унăн вĕçĕ, — 
Тата хăвăн кун-çулу! 

Аллă çуллăх сывлăх пултăр — 
Каччăран та ирттерен, 
Çутă çăлтăр йăлтăр! култăр, 
Çупăрлатăр сăн-питрен! 

Тăван кĕтесе кам манĕ? 
Çунат сарнă вырăна. 
Шулхара сан тус-тăванĕ, 
Килчĕç пурте хăнана. 

Персе çитрĕ хĕлле —
Илсе килчĕ сивве. 
Вичкĕн çил шăхăрать —
Урама йыхăрать. 

Акă тухнă эпир — 
(Хăратмасть пире чир!) 
Вăрçăлла выляма — 
Çĕр-шыва сыхлама. 

Вăрçă юлтăр вăййа — 
Ан хăраттăр çынна. 
Тус-тăванлăн пурнар — 
Çĕр çинче ыр курар! 
 

Ним кĕтмен çĕртен пуçланнă 
Хаяр вăрçă пĕр çулла. 
Çав кунран тĕнче хумханнă —
Çăткăн Гитлера пула. 

Пирĕн ялсенчен те кайнă 
Вăй питти çынсем вăрçа. 
Ватă-вĕтĕ çеç юлайнă 
Çурма тăлăххăн тăрса. 

Çав тери хăрушă пулнă: 
Ишĕлнĕ çуртсем-йĕрсем... 
Тăшмана хăюллăн çулнă — 
Мĕн чул вилнĕ паттăрсем... 

Берлина çитме пултарнă 
Ман çĕр-шыв салтакĕсем. 
Ахаль мар-çке юн юхтарнă —
Килнĕ çĕнтерсе вĕсем! 

Янкăр çутă ир: 
Ыйхăра эпир... 
Теме сисрĕ чун — 
Вĕриленчĕ юн. 

Савнăç пĕтрĕ — çук, 
Хуйхă çеç ку чух.
Вăрçă тухнă кун 
Ылхану çеç сун. 

Алхассăн та вут — 
Çĕр-шыва ан сут! 
Тăшмана аркат — 
Тĕнчене тасат!

Сывлăшра çырла шăрши, —
Пиçсе çитнĕ çĕр çырли!
"Çынсене халь кун йышши
Тавар, — терĕм, — чи кирли".

Çĕр çырли пăхма хитре.
Çук та пуль унран тутли!
Ăна татрăм ик витре, —
Пĕри — кайса сутмалли.

Ÿркенмерĕм те татма —
Ман сутма та пĕлмелле.
Хаваспах çырла сутма
Пычĕ шăллăм та пĕрле.

Малтанах черет тăрса
Илчĕç пирĕн тавара.
"Тутлă! Тутлă!" — мухтаса
Сывлăх сунчĕç хамăра.

Савăнма кунтан ытла
Мĕскер кирлĕ сутăçа?
Çĕклентерчĕ кăмăла
Кĕсьери çут вак укçа.

Тута купăсĕ тупса
Илтĕм эп магазинта.
Пĕчĕк çĕçĕ суйласа
Илчĕ шăллăм та унта.

Хăпарса çитсен сăрта
Умра курăнчĕ вăрман.
Шăллăм уçă сулхăнта
Шăхлич турĕ çăкаран.

Тута купăсĕ мана
Ас илтерчĕ хăй çинчен.
Шăхлич, купăс вăрмана
Янраттарчĕç темĕнччен.

Ют сас-чÿ чăрмантарса
Çÿремерĕ вăрманта.
Кайăк-кĕшĕк шăп ларса
Пăхрĕ пирĕн концерта.