Кÿлçырма ялĕ 225 çул тултарнă май 

Юратнă ялăм — Кÿлçырма —
Ыр Трак енри çăтмах кĕтесĕ 
Çут пурнăç кÿнĕ сăпкунта 
Ачашласа-савса ÿстертĕн. 

Çутçи те Хапăс, Мăн урам, 
Атте-аннен сăпайлă килĕ, 
Йăмраллă çыр, пĕве, вăрман — 
Нихçан асран тухми ăш пиллĕ. 

Вĕрентрĕн тĕрĕссĕн пурнма, 
Ĕмĕтленсе чиперленмешкĕн, 
Тĕллевлĕ шухăш-кăмăлпа 
Пуласлăха шанса кĕтмешкĕн. 

Ытарайми ыр Кÿлçырма — 
Атте-анне суйланă ялăм! 
Пурнсам, телей кÿр халăхна, 
Кун-çул тĕрекĕ эс, вăй-халăм. 

Тавах сана, эс — чун ăшши, 
Йăваш, сăваплă та сăпайлă, 
Илем тĕнчи, чĕре таппи, 
Черченкĕ, çепĕç те хăватлă.

Хайламашкăн сăвă çăмăл тетĕр-и? 
Çумăр пек сăмах вăл тÿперен ÿкмест. 
Каласассăн уççăн, килĕшетĕр-и? 
Çухалсан пĕр рифма ыйхăм та килмест. 

Пурпĕрех, ан тивĕр, çырасах килет — 
Тăвалла кăна тăр çулĕ сăвăçсен. 
Çут тĕнче кĕтречĕ чуна илĕртет, 
Ыткăнать Пегасăм уçлăха чĕнсе. 

Чарма çук ăна тек турăсăр пуçне, — 
Пĕртен-пĕр хуçа вăл вутлă çĕмренсен. 
Чурине памасть-çке пĕр усма пуçне, — 
Чулланать чĕри ун канăç çĕнтерсен. 

Апла-тăк, Пегасăм, çунатна сарсам, 
Ывăнми ялан эс пулччĕ вĕçевре! 
Сăвăçна вăй-хал та çут тивлет парсам, 
Унсăр хăв çухалăн ĕмĕр-ĕмĕре!

Петĕрпе Якур пĕрле, 
Пурăнаççĕ кÿршĕлле. 
Петĕр аншарли ĕçмест, 
Якур вара тиркемест. 

Петĕр пÿрчĕ кермен пек, 
Ал ăстийĕ чăннипе. 
Якур чирлет ĕçнипе, 
Ÿпке-пĕвер чирĕпе. 

Юхăнтарчĕ кил-çуртне, 
Пымасть алли ун патне. 
Ялан шăварать пырне, 
Хĕн кăтартать çемйине. 

Кашни кунах ун мухмăр, 
Кивçенле ĕçет Якур. 
Каласан та çук усси, 
Пулмасть пурнăç тăвасси. 

Ĕçсен манать кил тĕлне, 
Шыраттарать мăшăрне. 
Çухатрĕ сăн-сăпатне, 
Пĕтерчĕ хăй сывлăхне. 

Эрех пĕтмĕ нихăçан, 
Намăс кăна халăхран. 
Хăвăн ятна варалан, 
Пурăн çынсемпе пĕр тан! 
* * * 
Тек вуламăп эп мораль — 
Пĕл, хăвна тытма эс халь!

Ачаран эпир киленнĕ
Ункă шывĕн илемпе.
Пĕчĕкрен ишме вĕреннĕ,
Тупăшнă пĕр-пĕринпе.

Шывĕ сиввине пăхман.
Çиччĕ кĕнĕ Çимĕкчен.
Чирлесе курман нихçан
Çирĕп пулнă пĕчĕкрен.

Ункă шывĕ вăйĕпе
Çăнăх арманĕ ĕçленĕ.
Ватти-вĕтти кунсерен
Пулă тытма çÿренĕ.

Иртсе кайрĕç вăхăтсем
Савнăç пĕтрĕ ачасен.
Ун чухнехи çулсене
Курап халĕ тĕлĕкре.

Савнă Нимĕчкассинче 
Пурăнать ман хуняма. 
Ирхи хĕвел шевлипе 
Анне тухать урама. 

Вăл ярать сурăхсене 
Ялти пысăк кĕтÿне. 
Ырă кăмăллă анне 
Уçать кунта хăй чунне. 

Вăл тивĕçлĕ канура, 
Тăрăшать хуçалăхра. 
Савнă ачисен сумне 
Хывать хăйĕн тÿпине. 

Тимлĕх çитеймен чухне 
Каçарать вăл хĕрхенсе. 
Ÿстерет çапла чысне 
Витĕм кÿрсе чĕрене. 

Тавтапуç сана, анне, 
Çĕклентерен эс пире. 
Ялкăшать чунри хĕлхем, 
Санра пур чăн-чăн илем!