Янмурçинти Кирилл Петрович Петрова ăнăçу, телей сунса 

Аçу енчен — Çеруш йăхĕнчен
Ят-сумлă тавраш тăрăхра.
Ĕçре хыçра пулман халиччен,
Хисеплĕ çынсем ял-йышра.

Аслă пĕлÿ илме пултартăн
Эсĕ — зоотехник, сад ăсти.
Ырă ятпа халь пурăнатăн
Пур-ши тата сан пек ăсти?

Хурт-хăмăрпа чуна уçатăн 
Сывлăху çирĕп, хавшак мар.
Сакăр вунна хыçа хăвартăн
Вăй-хал енчен илсен патвар.

Хитре садра улма-çырлийĕ
Çулсеренех савăнтарать.
Ялан пуян сан сĕтел çийĕ—
Кĕтнĕ хăна килсех тăрать.

Пурнăç тени — этем шăпийĕ
Иртеймĕн Турă çырнинчен.
Килчĕ киле пурнăç нушийĕ
Çăмăл пулмарĕ халиччен.

Вăхăтсăрах хăраххăн юлтăн
Ывăлпа хĕрĕр те халь çук.
Эс пулмăн нихăçан та ютă —
Ывăлу пур сан, çич мăнук.

Пуçна ан ус нихçан та, тусăм,
Çак çĕр çинче эпир хăна.
Кашни ирех килсессĕн шуçăм
Телейлĕ кун пултăр сана!

Куç тулли — туратлă тăвансем...
Ман сире халь ыталас килет.
Чĕререн тухаççĕ сăмахсем —
Пĕр-пĕрне кашни телей пиллет.

Куç тулли — юратнă юлташсем...
Ман сире халь чуп тăвас килет.
Эсир маншăн пурте çулташсем —
Пĕр-пĕрне кашни телей пиллет.

Куç тулли — ĕретлĕ ĕçтешсем...
Ман сире халь ыр сунас килет.
Тулăх пулччăр пирĕн сĕтелсем —
Пĕр-пĕрне кашни телей пиллет.

Куç тулли — хисеплĕ хăнасем...
Ман сире халь тав тăвас килет.
Çапла лайăх иртчĕр уявсем —
Пĕр-пĕрне кашни телей пиллет.

Кĕрхи пурлăх паян кĕлетре — 
Ял ĕçченĕ ялан хисепре: 
Ăста алăсенче ĕç вĕрет — 
Çĕр çынни пĕтĕмпех ĕлкĕрет... 

Ĕçлесессĕн кăна эс пуян — 
Кулленех çакна лайăх туян. 
Сан пур енлĕ ăста пулмалла — 
Чĕре хушнă пек вăй хумалла. 

Ĕç пырсассăн ялан шав ăнса —
Пурăнас та килет савăнса. 
Хамăр тунă ĕçрен пахи çук, 
Тăван тăрăхăмран хакли çук. 

Сулăмрах-тăк халь пурнăç утти — 
Нихăçан сÿнес çук ял çути. 
Ан хуплаччăр хура пĕлĕтсем —
Çитсе пыччăр таса ĕмĕтсем.

Пире пĕчĕкрен сăпкара эс ӳстертĕн,
Илсе Шетмĕпе Çавалтан вăй-хална.
Атте-аннесен çăкăрне эс çитертĕн —
Чунтан тав сăмахĕ калатпăр сана.

Пирĕн тĕллевĕмĕр,
Пирĕн телейĕмĕр —
Хамăр çуралнă юратнă Трак ен.
Мĕн-ши тӳсмерĕмĕр,
Нишлĕ ӳсмерĕмĕр —
Савнă Трак ен, эс татах тĕреклен!

Пире ыррине вĕрентсе эс çын турăн,
Умра — ăраскаллă та çутă тивлет.
Ĕçре пархатар кăтартатпăр маттуррăн,
Санпа мухтанса пурăнассăм килет.

Пирĕн тĕллевĕмĕр,
Пирĕн телейĕмĕр —
Хамăр çуралнă юратнă Трак ен.
Мĕн-ши тӳсмерĕмĕр,
Нишлĕ ӳсмерĕмĕр —
Савнă Трак ен, эс татах тĕреклен!

Эпир тăванла алла-аллăн утатпăр,
Малтан малалла инçете тинкерсе.
Пулас ăрусемшĕн çĕн шанчăк туптатпăр —
Пыратпăр куллен йывăра çĕнтерсе.

Пирĕн тĕллевĕмĕр,
Пирĕн телейĕмĕр —
Хамăр çуралнă юратнă Трак ен.
Мĕн-ши тӳсмерĕмĕр,
Нишлĕ ӳсмерĕмĕр —
Савнă Трак ен, эс татах тĕреклен!

Эпĕр питĕ телейсĕр çуралнă —
Аслă вăрçă пуçланнă çулта.
Аттесем çапăçу хирне кайнă —
Арçынсем сахалланнă ялта...

Аттесем вăрçăра парăнмарĕç —
Ăнланатпăр вĕсем тӳснине.
Аттесем вăрçăран таврăнмарĕç —
Пĕлеймерĕç эпир ӳснине.

Вăрçă шавĕ кĕрлерĕ те иртрĕ —
Арканмарĕ текех çирĕп мир.
Пуçсене шурă юрĕ те витрĕ —
Асатте те халь пулнă эпир.

Тахçанах пирĕнпе çук пулин те —
Манăçмаççĕ нихçан аттесем.
Нимле вăрçă ан курччăрччĕ ĕнтĕ
Паянхи ачасен ачисем!