Генӑн «тӗлӗнтермӗш» мотоциклĕ ҫине ача-пӑча куҫӗпе пӑхни
Илсе панӑ Генӑна
Мотоцикл... тем тума...
Урама тухмассерен
Йӗкӗлтет пур шӑлйӗрен:
—Ну, мӗнле сан, Геннади,
Мотоцикл чупать-и?
—Чуптарас пулсан ӑна,
Руль тытас пулать кӑна!
Урӑх нимӗн те кирлӗ мар!
—Пулаймасть-тӑк —хама пар!..
Мотоцикл Генӑна
Ывӑлӗ мӗскер тума
Илсе панӑ. Ых! Ӑна...

Тюмень хулинчи Михайловский пасарта пулнă май

Мишша пасарĕ тесе ят панă
Тюменьри кермен çурта. 
Епле ăна тума пултарнă, 
Кĕрсен утан хутран-хута. 

Зал варринче чечен фонтанĕ 
Хĕл варринче тапса тăрать. 
Çак илеме курсан кам манĕ? — 
Таса çăл куç ума тухать. 

Тавраллипех лавкка — сăнатпăр, 
Пуян епле сентрийĕсем. 
Чăваш таварĕсене сутатпăр, — 
Тееç пире сутуçăсем. 

Ертÿçĕ пирĕн пултаруллă,
Ахальтен мар кермен хуçи. 
Эпир Вăрнарпала та туслă — 
Пахалăх лайăх кăлпассин. 

Ентеш Володьăна ырлаççĕ: 
"Находка” пирĕншĕн, тесе. 
Пасарĕсем татах пур, теççĕ, 
Вĕри апат çиме чĕнсе. 

Çÿлти хутра кафе-столовăй —
Кăмăл пулсан ларса çиме. 
Ман мухтамашкăн пур сăлтавĕ — 
Хамăр ентеш çине çитсен.

(Тăван çĕр-шывăн Аслă вăрçин тапхăрĕнче çуралнисене халаллатăп)

Çĕкленчĕ шуçăм, 
Çĕн куншăн — пуçлăх. 
Тĕнче илемĕ 
Синкер пиллемĕ. 

Çĕр-шыв-аннемĕр
Эс пурăн ĕмĕр! 
Санра — пуласлăх, 
Санра — малашлăх! 

Ачалăх пулчĕ —
Чунра йĕр юлчĕ. 
Сăпкамăм витĕр 
Çул хыврĕ Гитлер. 

Пур халăх каррăн,
Тăрса вăр-варрăн, 
Çĕкленчĕ харăс... 
Çĕнтерчĕ харсăр. 

Çĕр-шыв хăвачĕ
Каллех хăпарчĕ. 
Пиллерĕ ирĕк, 
Чуралăх, сирĕл! 

Эсир хăватлă,
Халь ик çунатлă. 
Çул-йĕр хыватпăр, 
Çурт-йĕр лартатпăр!

Çуралатпăр çĕр çине, ÿсетпĕр
Аслисен тĕпе хурса пилне. 
Мĕншĕнне çеç уççăн пĕлейместпĕр, 
Çул шырать кашнийĕ хăйĕнне. 

Ăраскал пурин расна пулсан та,
Пĕр тĕллев этемлĕхĕн пурах, — 
Юр хĕлле хăçан, епле çусан та, 
Пурпĕрех таçта та шап-шурах. 

Тупсăмĕ, тен, çынлăх, шутласассăн,
Сунасси ырри çеç пĕр-пĕрне. 
Кун-çула чысра-сумра тăсмашкăн, 
Хăварма хăй ятлă çăлтăрне! 

Пурнăçăн тĕвви пулать, тен, çакă,
Çут телейĕмĕр кулли-ăшши? 
Сăлтавне, тен, тупрăмăр та акă, 
Çакă мар-и çут кун-çул тĕшши?