* * *
Шурă хурăн, йăрăс хурăн,
Ăмсанатăп сан тумна.
Пурнăçри чи çепĕç юррăн
Йăпататăн ман чуна.

Юнашар эп тăрăттăм,
Кăтруна ачашлăттăм.
Шупăрпа вараласран
Пăрăнатăп çумăнтан.

* * *

Сăнап шыва, вăл калăн тĕпсĕр,
Унта ман сăн, сенкер тÿпе.
Хум ташшипе вылять пĕр тĕлсĕр
Хĕвел шевли вуншар тĕспе.

Май çук иккен, тинех ăнлантăм,
Тăр шыв тĕпне курма нихçан.
Асрах, яш чух эп улталантăм,
Савни, сана пăхса куçран.

* * *
Хĕвел каллех çÿл тÿпене тĕренчĕ.
Юр айĕнчен тухать суха касси.
Ирпе ирех çур çитнине пĕлтерчĕ
Йăмра çинчен хура курак сасси.

Йăлт кутăнла халь, самани те урăх.
Путек-качка сăрт çамкине тухмасть.
Сĕлкĕш çинче çара уран, чарусăр
Ача-пăча кăшкăрашса чупмасть.

Ялта ялан та ятлă çын сухаçă
Паян вара çак чăнлăха пăсса,
Хура çĕре манса "хастар” сухаçă
Мул шыраса çÿрет тĕнче касса.

Хăй пĕрлĕхне çухатнă сумлă йышăн
Куç кĕретех кĕрнеклĕхĕ чакать.
Ял тамалать паян, хухать ял-йышăм.
Кам хулана, кам "леш яла” каять.

* * *
Сÿнмен-ха хам ята çĕкленĕ хушă,
Кунпа çĕре ылмаштаратăп чух.
Тем ăшă мар чуна, чунра пуш-пушă,
Ватăлăхра пушшех те канăç çук.