Ĕç ялан вăл сумлă пулнă,
Ĕç — уяв мĕн ĕлĕкрен.
Ахальтен-им капăр тухнă
Чăвашсем çĕр ĕç патне!

Кĕрхи кун пуян та тулăх
Хыт ыйтать çĕр ĕçченрен:
"Чунтанах пар(ă)нса эс тăрăш
Шуçăмран мĕн çĕрлеччен".

Киленсех ĕçлет-ха халăх
Уй-хирте, йĕтем çинче...
"Хĕл каçмалăх та акмалăх
Пултăр тырă кĕлетре".

Çĕр-шыва тивĕçтересшĕн
Сар хĕвел пек çăкăрпа.
Тăрмашать-ха çĕр ĕçченĕ
Пархатарлă шухăшпа.

Ĕлĕкрен чăваш ĕçчен вăл,
Çĕр ĕçне тăвать ăста.
Паян кун та çирĕп тыттăр
Çĕнсе илнĕ ыр ята.

Савăнар сар хĕвел шевлисемшĕн
Çуттăн-çуттăн выляччăр вĕсем.
Савăнар йышлăн,
Туслăн пур(ă)ннишĕн
Шанчăкпа тулччăр-и чĕресем?

Пĕр-пĕрне ăнланса хутшăнсассăн
Кăмăл савăк пулать кашнинех.
Чĕререн çынсене ыр сунсассăн —
Пурнăç пулĕ тата хитререх.

Пĕтĕм çут тĕнче илемлĕ
Ылтăн кĕркунне.
Асамат кĕперĕ тĕслĕ
Тăхăнать тумне.

Мĕн тери чĕре сипетлĕ
Ун ытамĕнче.
Çут çанталăкăн çут пилĕ, —
Шеп ырлăхĕнче.

Тĕрлĕ çимĕçпе сăйлать вăл
Йăлт тивĕçтерсе.
Çĕкленет килĕшсе кăмăл
Ырлăхпа пĕрле.

Савăнар-и, савнă тусăм,
Савăк тивлетпе.
Пирĕн те кÿресчĕ усă
Чун илемĕпе.

Ванюкпа Санюк пĕрле
Хăвăрт çитрĕç шыв хĕрне.
Ларчĕç пĕлтĕрхи тĕле,
Хăвалăх ÿснĕ енне.

— Тĕлĕк куртăм иртнĕ каç, —
Тет Санюк хăлаçланса.
— Кĕнĕ вăлтана карас! —
Йăл! кулать хăй мухтанса.

— Ан шавла-ха, шăпăрт пул, —
Тет Ванюк хирĕçлесе. —
Пулăсем хăраççĕ пуль,
Вăлтуна пăх тимлесе?

— Ванюк, пăх-ха, ку мĕскер,
Ишет шывра шăртлăскер?..
Асăрхамасть вăл пире,
Ишсе çитрĕ шыв хĕрне!

Сăмсипе нăш-нăш! туртать,
Ешĕл курăка татать.
Пире курчĕ те çакскер,
Шыва чăмрĕ шиклĕскер.

Тепре тухать-ши тесе
Шăп ларатпăр итлесе.
Халăм пĕтрĕ сыхласа,
Ăман тиртĕм васкаса.

Салху юлчĕ ăшăмра,
Çухатнăшăн вăхăта.
Хăвалăхри ăтăра
Çаклатаймăн вăлтапа.