Эпĕ хамăн Трак ене
Питĕ юрататăп.
Пулăшап ват çынсене,
Йывăçсем лартатăп.

Çыннисем пирĕн енче
Туслă пурăнаççĕ.
Паллашаççĕ çамрăксем –
Туйсем те пулаççĕ.

Пирĕн енчи пĕвесем
Çутă та илемлĕ.
Шывра ишекен атьсем
Питĕ те телейлĕ.

Юнашарти вăрмана
Час-часах каятпăр.
Кăмпа, çырла, мăйăр та
Татса таврăнатпăр.

Хам çуралнă вырăна
Питĕ юрататăп.
Уяв ячĕпе ăна
Ăшшăн саламлатăп.

Юратнă районăм, савса саламлатăп
75 çул тултарнă ятпа.
Санпа мухтанатăп та мăнаçланатăп,
Эс маншăн хакли – ĕçÿпе, сăнупа.

Ялсем, вăрмансем, уй-хирсем те çулсем,
Шывсем, çарансем, çырма-çатрасем,
Пĕвесем, кÿлĕсем, садсем те çуртсем –
Йăлтах ку пуянлăх, ку манăн Трак ен.

Пурăнатăп салара,
Вăл хитре, илемлĕ.
Аслă чаплă урамра
Çурчĕсем те çÿллĕ.

Ярăнатăп йĕлтĕрпе –
Вăрманта пит лайăх.
Ярăнатăп конькипе –
Яп-яка пăр çийĕ.

Эс татах та хитрелен,
Кунсерен ÿссе пыр.
Хăватлан та пуянлан,
Пурне те телей кÿр.

Шетмĕ шывĕ хĕрринче
Ялăм сарăлса ларать.
Унăн тепĕр енĕнче
Вăрман кашласа ларать.

Çĕнелсех пырать ман ял,
Хăпараççĕ çурчĕсем,
Пурăнаççĕ çыннисем –
Пĕри тепринчен пуян.

Хамăр ял çине пăхсан
Мухтанмалăх пур çав ман:
Кунсерен ÿссе пырать,
Таса, хитре курăнать.

Тикĕс шăвать пурăнăç –
Çитĕнÿ те савăнăç:
Пĕрин çемье хушăнать,
Тепри çĕн пÿрте куçать.

Килĕшет мана ялта:
Уçă сывлăш, шăплăх та,
Тăвансем, туссем кунта,
Çывăх юлташсем – шкулта.

Юрататăп ялăма,
Ыр сунатăп ялăма.
Чечеклентĕр яланах,
Чунтанах ăна тавах.