Тăван çĕр-шывшăн пынă Аслă вăрçăра паттăррăн пуçне хунă Совет Союзĕн Геройĕ Васильев Владимир Васильевич палăкĕ умĕнче шухăша кайни
Герой пулма питĕ те йывăр!
Герой вăл - чи паттăр салтак!
Чĕри пулмалла унăн тимĕр -
Пултартăр чăтмашкăн йăлтах!
Герой пулма питĕ те йывăр
Тăшман вăйлăрах тăк санран!
"Сыв пул, юратнă çĕр-шывăм!"
Герой нихăçан та чакман!
Герой пулма питĕ те йывăр!
Герой ... вăйлăрах вилĕмрен!
Анчах та, тархасшан. ан тивĕр
Камсем вăл ята илеймен!
Герой пулма питĕ те йывăр!
Çич хут паттăр пул хăвăнтан -
Ăна параканĕ - Çĕр-шывăм!
Ыйтса илейместĕн унран!
Герой пулма питĕ те йывăр!
А камшăн, тен, çăмăл та пуль...
Ун пек тăк - парсан та ан илĕр!
Хăть ĕмĕр наградăсăр пул!
Герой пулма питĕ те йывăр!
Герой пулаймасть кашниех!
"Пуласчĕ!" - тесе тем ан шырăр...
Кам тивĕç - пулать вăл хăех!
Герой пулма питĕ те йывăр!
Чăн-чăн геройла хăть пуç хур...
Васильев - Герой! Лăпкă çывăр.
Манмастпăр сана. Эсĕ пур!
Герой пулма питĕ те йывăр!
Сана, ав, пушшех йывăр, тен...
Герой пулнине хăв, Владимир,
Паян кунчченех пĕлменрен...
Герой пулма питĕ те йывăр!
Герой вăл - мĕн ĕмĕр салтак!
Ун чухлĕ чăтаймĕ, тен, тимĕр -
А сан чăтмалла! Чăтмаллах!
Герой пулма питĕ те йывăр!
Эп халь ... ăнланатăп ăна.
Хушсассăн мана та Çĕр-шывăм...
... Вăрçийĕ ан пултăр кăна.
09.11.2001
