Ачасен пултарулăх конкурсĕ - Пирĕн пултарулăх - Каталог статей

Тăван шкул/"Ачасен пултарулăхĕ" конкурса

Доска, компьютер, мел, пукан,

Сĕтел, проектор та экран –

Ку – шкул, пире ăс паракан,

Вĕрентекен, çын тăвакан.

Ку шкул вăл хăй пысăк çемье,

Учитель – иккĕмĕш анне.

Ун ачисем кунта нумай –

Пурне те юратать пĕр май.

Ача-пăча куллен чупать –

Шкула вăл питĕ юратать.

Кунта ăсталăха туптать,

Пуласлăха шанса тăрать.

Учитель лайăх вĕрентет,

Вăйне пĕрре те шеллемест.

Ăнланмасан – ăнлантарать,

Йывăр пулсассăн – пулăшать.

Шкул пĕтерсе тухса кайсан,

Кашни хăй вырăнне тупсан…

Çавах шкул асăмран тухмасть,

Вĕрентекен асран каймасть.

Кашни ача пурнăçĕнче,

Ун асĕнче те чĕринче

Юлать юратнă тăван шкул,

Пире пиллет вăл такăр çул.

Алексей Михайлов, 9б класс,

Красноармейски иккĕмĕш шкулĕ,

«Кăмăл» вĕренÿ пĕрлешĕвĕ

Ертÿçи – Михайлова З.П.

Учитель/"Ачасен пултарулăхĕ" конкурса

Учитель маншăн – хаклă çын,

Учитель маншăн – çывăх çын.

Куллен урок ăнлантарать,

Эп ăнлансассăн – савăнать.

Пире чунтан вăл юратать,

«Иккĕ» илсессĕн – кулянать.

Анне пекех вăл туйăнать –

Пĕрре пăхсах вăл ăнланать.

Учитель юнашар чухне

Чунра та лăпкă, çăмăл-çке.

Ун ыр сăмахĕ – чĕрере.

Сăнарĕ – куçăм умĕнче.

Павел Никифоров, 5б класс,

«Кăмăл» вĕренÿ пĕрлешĕвĕ,

Красноармейски иккĕмĕш шкулĕ

Ертÿçи – Михайлова З.П.

Тавтапуç сире, учительсем/"Ачасен пултарулăхĕ" конкурса

Тавтапуç сире, учительсем,

Вĕрентнĕшĕн, ăс панăшăн тавах.

Çук сирĕн пек паха çынсем –

Тав тума çитмест пирĕн сăмах.

Мĕн пĕчĕкрен хама вĕрентнине:

Йывăр пулсан та – çĕнтермеллине,

Ăслă-тăнлă çын пулмаллине –

Асран кăлармăп, манмăп нихăçан.

Тавтапуç сире, учительсем,

Юратнăшăн, çын тунăшăн тавах.

Парнелетĕп капăр чечексем,

Сунатăп сывлăх нумай пурăнма.

Настя Иванова, 7а класс,

«Кăмăл» вĕренÿ пĕрлешĕвĕ,

Красноармейски иккĕмĕш шкулĕ

Ертÿçи – Михайлова З.П.

Учитель манăн чĕрере/"Ачасен пултарулăхĕ" конкурса

Учитель маншăн çывăх çын,

Пĕлÿ парать куллен пире.

Хавассăн вăл кĕтсе илет,

Ыр кăмăлпа пуçлать ире.

Кунран кун пирĕнпе пĕрле

Утать вăл ăс-тăн тĕнчинче.

Тав тума çитмест сăмах –

Пуçа таятăп умĕнче.

Учитель манăн чĕрере –

Манассăм çук нихçан Сире.

Чунтан тавах Сире, тавах,

Усратăп ĕмĕр асăмрах.

Ксения Григорьева, 8а класс,

«Кăмăл» вĕренÿ пĕрлешĕвĕ,

Красноармейски иккĕмĕш шкулĕ

Ертÿçи – Михайлова З.П.

Юратнă вĕрентекен/"Ачасен пултарулăхĕ" конкурса

Хаваспах шкула çÿретĕп.

Ма тесессĕн ман унта

Пур юратнă çын – учитель,

Пултаруллă та ăста.

Савăнсах класа кĕретĕп.

Ак, учитель те кĕрет.

Тăрăшсах эпĕ ĕçлетĕп –

Вăл вĕт лайăх вĕрентет:

Калаçма, тĕрĕс çырма та

Пит илемлĕ вулама.

Тарăннăн шухăшлама та

Шухăшăма палăртма.

Ват çынна хисеплеме те

Пурнăçра ыр çын пулма,

Чăваш чĕлхине пĕлме те –

Юратма та упрама.

Çут çанталăка курма та

Чечек шăршине туйма.

Пур чĕрĕ чуна савма та

Тăван ене юратма.

Чунтанах эп юрататăп

Хамăн вĕрентекене.

Ăнăçу, телей сунатăп,

Ăна манмăп ĕмĕрне.

Александра Яковлева, 6б класс,

«Кăмăл» вĕренÿ пĕрлешĕвĕ,

Красноармейски иккĕмĕш шкулĕ

Ертÿçи – Михайлова З.П.