Ĕнтĕ çĕр çаврăнать, çĕр çаврăнать
Пуçăмăрти çавра çĕлĕк пек,
Пирĕнех те кунсем тавăрăнать
Вăй варринчи купăс пĕрми пек.

Çавăрăнса юхан Çавал шывне
Кам каçас пур ик хут пĕр тĕлтен,
Ыталанса çÿрен хура-шурне
Кам сирес пур умри çул çинчен?

Аттеех те аннен таса пилне
Мĕн виличчен асра тытар-и,
Ятлăях та ятсен чыс çĕклемне
Чун çăкĕ пек чипер йăтар-и?

Ешерен туратсем хушшипе
Сăрхăнать сар хĕвел пайăрки,
Мĕн тери пархатарлă, чипер
Çут тĕнчен ыртăваслăх йĕрки.

Сăртламра ав çупкам та çупкам
Илĕртÿллĕн пиçет çĕр çырли,
Ырă çыннăм, ан ирт, тутансам, —
Сан енне туртăнать чи хĕрли.

Чăтлăхри пĕчĕк кайăк — чепчен —
Шăратать пысăк туйăм юрри,
Ан çÿре тет, тăванăм, пĕччен,
Чун кĕвви санпала пултăр-и...

Тавтапуç, шăнкăр-шăнкăр çырма,
Тайма пуç, ытарми чечексем.
Сар хĕвел ăшши пек юхăма
Ман хушасчĕ хам евĕр хĕлхем.

Вуниккĕмĕш хутра, балкон çинче,
Хĕрсем юрлаççĕ юрату юрри.
Юрри юхать, ай – хай, инçе, инçе,
Илтсен ăмсанĕ шăпчăк та тăри.

Çĕкленчĕ тепĕр капăр, селĕм çурт
Илем кÿмешкĕн шур Шупашкара,
Ӑна малтан саламлĕ кăвак çут
Çĕн кун пилленĕçем хуламăра.

Пăхатăн та çак çĕнĕ кермене –
Асилтерет вăл йăрăс йывăçа.
Çунатлă юрăçсем ун тăррине
Савса иленнĕн курăнать куçа.

Чăваш çĕршывĕн çепĕç пикисем,
Чун – чĕререн сунатăп ăшăмра:
Сире юратчăр савнă йĕкĕтсем,
Шÿтле калас – тăк, чи çÿлти шайра.

Виç вăй-мĕн тупăшнă яланлăх.
Пĕрремĕш парăнать пуянлăх.
Унтан илем калле чакать.
Пурне те çĕнтерет... сăпайлăх.

Виç вăй-мĕн тупăшнă яланлăх.
Пĕрремĕш парăнать пуянлăх.
Унтан илем калле чакать.
Пурне те çĕнтерет... сăпайлăх.