Анчах пĕрле çÿреттĕмĕр, Тамара.
Сахал-и çуннă саншăн ман чĕре?
Тамара, Тома, венчете пире,
Ах, шел пулин те, пурнăç тăратмарĕ.

Хупларĕ ман çула халь хура эрĕм, –
Ют арăм эс. Кампа уçас чуна?
“Тăхта-ха”, – терĕм тĕл пулсан сана.
“Çынсем курсан, сăмах вĕçтерĕç”, – терĕн.

Вăрт çаврăнса эс уйрăлтăн манран.
Кайран, кайран пĕр арçынпа калаçрăн.
Хулран тытса пĕрле çул урлă каçрăн.

Сăну тухать ман куç умне ялан.
Ман хăлхарах, Тамара, сассу сан, –
Ман чĕрене кĕрсе каллех вырнаçрăн.

“Парнелетĕп кăмăлтан
Сана, – терĕн, – юрату”.
Эппин эс ман пурнăçран,
Савнă тусăм, юрă ту.

Çил пулам эп.
Пул хăва, –
Чуп тăвам ыталаса.
Çĕр çинче юратăва
Кам кăларнă шутласа?

Хĕвелтен те вăл вĕри, –
Ăна туйрăм эп чунпа.
Вут хумасăр çын чĕри
Ирĕлет юратупа.

Халь манăçнă.
Ĕлĕксенче
Ял-йышăн пурччĕ ыр йăла.
Авăн сăри кĕр вĕçĕнче
Тăватчĕ вăл – ан та кала!

Кĕрекере тулли курка
Çÿретнĕ –
Шалт ĕç кашнинче.
Ĕçре ыратнă шăмшака
Сипленĕ авăн ĕçкинче.

Çухалса-ши юлнă ăнсăртран?
Кирлĕ мар-ши пулнă вăл
Пачах?
Чукун çул вокзалĕнче чунтан
Амăшне йĕрсе чĕнет ача.

Çамрăксем
Унран те именеççĕ,
Ватăсен
Те хăлхисем илтмеççĕ.…

Мĕскер пултăр ачаран пахи!
Ăшшăн тытрăм хам çума
Ăна.
Чун савни савса чечек çыххи
Парнеленĕн туйăнчĕ мана.

Ах, çапах та,
Амăшне курсан,
Виç сăмах калас килет-ха ман.

Ÿпкелешместĕп эп хама
Ку таранччен те
Мул пухманшăн.
Çак çĕр çинче чуна уçма,
Тăван кĕтесĕм,
Эс пур маншăн.

Тăван кĕтес,
Ĕнен мана, –
Чăн, маншăн эс – ял-йыш саламĕ.
Мĕнле сăмах тупса
Сана
Хам юратни çинчен калам эп.

Ик ĕмĕр тур паман çынна.
Пĕлетĕп, эпĕ те вилетĕп.
Вилсессĕн те –
Сан ăшшуна
Нÿрлĕ çĕре илсе кĕретĕп.