“Çÿп эс!” –
Терĕ мана арăм, –
Хирĕç ним те калаймарăм.

Пĕр ÿпне çăпан, ара,
Ма тухмасть чĕлхи çине.
Кам пĕлмест пуль таврара
Эпĕ атă ăстине.…

Мĕн вăл атă çĕлесси!
Хĕн –
Арăма юрасси.

Кун пек кам ара хăтлантăр?
Хĕрĕхри кăтра Никантăр
Качча илчĕ Марьене.
Ун çумне, тÿшек çине,
Каç пулсассăн хăпăл-хапăл
Кĕрсе выртрĕ çурăмпа вăл.

Малтанах Марье чĕнмерĕ, –
Шăп выртма та хал çитмерĕ.
Хайхине çурăмĕнчен
Кÿп! тутарчĕ виç хутчен.
– Эй-ай-яй, – терĕ, – ни кантăр,
Ни пуса эсĕ, Никантăр.

Кинемипе мучи каяççĕ
Автобуспа тĕп хулана.
Хутран-ситрен калаçкалаççĕ, –
Каяççĕ пулĕ хăнана.

Шур çÿçлĕ пуçĕнчи карттусĕ
Ÿкес пек чалăшнă мучин.
Арпашнă пек тата шур çÿçĕ
Ĕшеннĕ сăнлă кинемин.

“Çул самаях-çке ĕшентерчĕ, –
Кăшт шуç-ха”, –
Терĕ мăшăрне.
Мучи çине вăл тĕршĕнтерчĕ
Кăшт тĕлĕрес тесе пуçне.

Хутран-ситрен калаçкалаççĕ
Юнашарсем хуллен кăна.
Кинемипе мучи каяççĕ
Автобуспа тĕп хулана.

“Маншăн эс – хĕвел кулли”, –
Терĕм. Илтрĕн вĕт хăвах.
Чечек кăшăль сан валли
Турăм пĕр сăмахсăрах.

Анчах санăн савакан
Пулнă имĕш мансăрах.
Шилеттерчĕ хăлхаран
Вăл та пĕр сăмахсăрах.

Татьяновка...…
Пĕлетĕр-и?
Çак ятлă ял вăл Çĕпĕрте,
Шăна-пăван е кăмари
Чăтма çук хĕвĕшнĕ çĕрте.
Кержак мучи сар чĕлĕмне
Паклаттарса, ăш канмалла
Çак ял çинчен калаçăвне
Пуçларĕ хурлăхлăн çапла:
“Татьяновка Татьянăна
Ас илтерет мана ялан.
Чăвашчĕ вăл. Кунта ăна
Илсе килсеччĕ çĕр шăнсан.
Татьяна çунă каçсерен
Ялти правлени урайне.
Вăл ăнсăртран сĕтел çинчен
Ÿкернĕ Сталин тăм бюстне.
Тăм бюст кăшт катăлнă, чăнах.
Такам “лере” евитлеме
Шут тытнă. Килнĕ çавăнтах
Татьянăна арестлеме.
Çынни пулсассăн – статйине
Пит хăвăрт тупнă ун чухне.
Суд çапнă çамрăк хĕр çине
Халăх тăшманĕн клемине.
Сăрт-ту ванать, анчах çынна
Ăçтан хуçан – тÿсет чĕре.
Хаяр статья Татьянăна
Илсе çитернĕ Çĕпĕре.
Ах, Çĕпĕр, Çĕпĕр, ĕлĕкрен
Хăпартнă вăл çын сехрине.
Пусмассерен халь те илтен
Этем шăмми калаçнине.
Кунта куçарнă çынсене
Хĕле кĕрсен, вăрман касма.
Хĕрарăмсен пĕр ушкăнне
Васкатнă çĕр пÿртсем чавма.
Ялта чухнех мĕн пĕчĕкрен
Татьяна хăнăхнă ĕçе.
Çĕр алтнă пилĕк суриччен
Алран ямасăр кĕреçе.
Чăтăмлăран ĕç нормине
Куллен тултарнă ирттерсе.
Çĕр пÿртĕн пĕр стени çине
Вăл çырнă хăй ятне чĕрсе.
Çак ят малашлăха чĕнсе
Çуратнă шанчăк пирĕнте.
Эпир Татьяновка тесе
Калаттăмăрччĕ çĕр пÿрте”.
Кержак мучи сар чĕлĕмне
Паклаттарса, ăш канмалла
Çак ял çинчен калаçăвне
Вĕçлерĕ кăмăллăн çапла.