Шӑнкӑр-шӑнкӑр Шетмӗ теҫҫӗ, 
Тек ҫыраҫҫӗ сӑвӑсем.
Шӑнкӑрсассӑмра илтмеҫҫӗ
Манӑн упкеве вӗсем.

Мӗншӗн-ха мана ҫын манчӗ?
Ма эп ӗҫсӗр шӑнкӑрти?
Кунашкал ят-сумсӑр марччӗ —
Астӑватӑн пуль, ватти?

Мӗн чул ҫын шьвра чухеннӗ,
Ярӑннӑ хур-кăвакал,
Ҫыранпа хумсем пупленӗ,
Хум яма юлмарӗ хал.

Ҫӑвӗн-хӗлӗн хӑнтӑртатнӑ
Ман вӑйпа улт-ҫич арман.
Тырӑ авӑртнӑ, ҫӑм тапнӑ—
Эп ахаль шӑнкӑртатман.

Эп ҫӗкпенӗ нӳрӗ варкӑш,
Сывлӑм шӑрҫисем акса.
Авӑтнӑ каҫ-ирӗн карӑш,
Пурҫӑн улӑха савса.

Шетмӗ — ГЭС тени пӗр хушӑ
Ҫутатсаччӗ Васнара.
(Тӑрӑшнӑ пӗр вырӑс уншӑн,
Ял усрать ятне асра).

Халӑх! Ӳпкеве илтсемӗр,
Пулӑшсамӑр: ҫӗкленем!
Яманак ял-йышӗн евӗр
Пулччӑр ҫирӗп пӗвесем.

Пулӑсем сиксе выляччӑр,
Тулӑхланччӑр улӑхсем.
Ырлӑхӑм ҫинчен ҫуралччӑр
Ҫĕнӗ сӑвӑ-юрӑсем.

Эс лаштраран, симпыллӑран 
Сана лартатпӑр ӗмӗртен.
Ҫӗр-аннене те эс упран
Шыв-шурпала ишӗлесрен.

Санпа, йăмра, ҫырма-ҫатра
Вӑрман пек лартӑр кашласа.
Ҫӑл куҫ вӑй илтӗр сулхӑнра,
Палкатӑр, юхтӑр юрласа.

Тӑван Васнар, cap хумлӑ хир,
Ҫырми-ҫатри — пурте эсир
Мана асамлӑ вӑйпалан
Чӗнетӗр ытама ялан.

Сирӗнпеле ман ӑраскал,
Кунта вӑй илнӗ ман ӑс-хал.
Кунта хӗвел те ҫутӑрах,
Тапать чӗрем те ҫӑмӑлpax.

Атте-анне пилленӗ ен,
Юнра-чунра эс пӗчӗкрен.
Кун-сул вӗҫне тухсассӑн та
Выртасчӗ сан ытамунтах.

Пирӗн ял йӑмраллӑ,
Килӗрен—садсем.
Пурт-ҫуртсем те паллӑ,
Калӑн—керменсем.

Фермера ӗҫлеҫҫӗ
Ылтӑн алӑсем.
Пархатар кӳреҫҫӗ 
Ҫӗр-шыва вӗсем.

Тинӗс евӗр хумлӑ
Уй-хирте тыр-пул. 
Ял-йышсем ят-сумлӑ
Халӗ ҫултан-ҫул.

Ӗмӗтсем сунатлӑ,
Шав ӳсет вӑй-хал.
Чаплӑран та чаплӑ
Пулӗ пирӗн ял.