Пирĕн пултарулăх - Каталог статей - Нестер Янкас ячĕллĕ пĕрлĕх

Кунсен шутне шутла-шутла

Шăвать кун-çулăм малалла.

Çĕлен çулне те ак ăсатрăм

Пире чĕтретрĕ вăл хăватлăн.

Ырри те пулчĕ пуль пайтах

Анчах çĕлен сăхать хытах.

Халь ĕнтĕ ĕçлĕ çул шырар,

Лаша кăмăлĕпе пурнар.

Алрахчĕ пултăр тилхепе,

Юртар-ха ырлăх çулĕпе.

Ан çухатсам çулна, Лашам,

Санра эп шанăçа курам.

Çĕн çулăн кĕреки кĕрле,

Лашам, эпир ялан пĕрле!

Çитрĕ те тĕпĕртетсе

Шурă лаша çулĕ —

Кашниех хĕпĕртесе

Кĕтсе илчĕ пулĕ...

Хăнасем паян нумай,

Кĕреке те тулăх...

Кив çула ăсатнă май,

Усалли, ан çулăх!

Тăвансем йĕри-тавра —

Кăмăла уçаççĕ...

Юрласассăн пĕр çавра —

Ташлама пуçлаççĕ.

Савăнаççĕ ваттисем,

Çамрăксем те йышлăн...

Ĕмĕтсем — çунатлисем

Пурнăçланччăр чыслăн!

Мăн Шетмĕ тăрăхĕн мухтавлă ывăл-хĕрĕсем. Сăвăлла калав.

Мӑн Шетмӗ шкулӗнче ӗҫленӗ

Сатирик — Сӳпенкке Илли.

Ҫырма ӑна вара пилленӗ

Иван Мучин ҫӑмӑл алли.

Тусĕсемпе — Шавли, Сироткин,

Уяр, Колюшкинпа Нямань –

Тĕл пулнă, ҫырусем ҫÿретнӗ,

Пĕрне-пĕри вĕсем манман!

Сÿпенккене юратнă «Капкăн»

Хăй ачи пек. Мĕн-ма тесен

Пулнах çав хăйне май талантлă

Ун шÿчĕ-фельетонĕсем.

Шкулта та ӑннӑ унӑн ӗҫӗ.

Директор пулнӑ. Тивĕҫпех.

Анчах та шел: ылханлӑ вӑрҫӑ

Татать ҫыравҫӑ пурнӑҫне.

Манман-ха кӑшт астукалаҫҫӗ

Мӑн Шетмӗ шур сухалёсем!

Хӗветёр Уяра. Ҫыравҫӑ,

Синкерлӗ вӑхӑтсем ҫитсен,

Кунта ачасене вӗрентнӗ

Тӑван чӗлхемӗре кӑштах.

Шупашкарта вăл тем тесен те

Ĕҫ тупайман ӗнтӗ, паллах.

Вӑл вӑхӑтра: камсем элекҫӗ —

Ҫавсем ҫеҫ пулнӑ хисепре.

Чӑвашӑн чӑн интеллигенчӗ!

Чӗтре вӗсем умне тӑрсан! Чӗтре!

Ҫук! Ҫук! Вӗсем... хӑйсем чӗтренӗ

Пулнишӗн вӑйсӑр Уяртан!

А вӑл ҫав "ҫынсене"... хӗрхеннӗ,

Пĕр сив сăмах та каламан...

(Малалли пулать).

Мăн Шетмĕ тăрăхĕн мухтавлă ывăл-хĕрĕсем. Сăвăлла калав.

Художник Алексей Григорьев -

Профессор пулнă. Четриксем.

Картинăсем ăста ÿкернĕ.

Поэзи чунĕллĕ этем.

Шкултах, Супенккене пула вăл,

Пуçланă сăвăсем çырма.

Ун пулнă псевдоним - "Бывалый"!

Кăшт... çапларах-ши курăнма...

Анчах сăввисене нихçан та

Вăл пичете паман пулас.

Хăй пуçĕпе хăех ăнланнă: '

Поэт пулмашкăн... кирлĕ сас!

Вара вăл каснă урăх алăк

Тăван культурăна кĕме:

Мĕн чуль тĕпчев, статья, каталог...

Никам хаяймĕ тиркеме!

Трофимов Прохор: Çap çыннийĕ.

Полковник. Пулнă вăрçăра.

Ку темăпа вăл мĕн çырнийĕ

Выртман библиотекăра.

Эпир ача чухне: вуланă

Пĕр-пĕринпе ăмăртмалла.

Мĕнле-ха савăннă, мухтаннă

Ун кĕнеки лексен алла!

Вара... вара алран ямасăр,

Çыврас килсея те — çĕрĕпе

«Çÿренĕ" чăлкăм куç хупмасăр

Кĕнекери геройсемпе.

Ирпе ирех, шкула кайсассăн,

Сăмах — çав кĕнеке тавра!

Çапла вĕрентнĕ юратмашкăн

Пире çуралнă çĕр-шыва.

Мăн Шетмĕ тăрăхĕн мухтавлă ывăл-хĕрĕсем. Сăвăлла калав.

Редакторччĕ Хисеплĕ Анна

Васильевна. Кушар енчен.

Вăл хăйĕн пурнăçне йăлт панă

Хаçат ĕçне. Ним юлмиччен.

Тракра ĕçлерĕ вăл пĕр хушă,

Каярахпа, ав - Сĕрпуре.

Пĕлместĕп: пулнă-ши ун пушă

Самант хăть хăй валли пĕрре?

Пулман! Пулман тесех калатăп

Ăна эп çывăх пĕлнĕрен.

(Турти кăштах лекет-мĕн-ха та

Мана Çĕньял Шетмĕ енчен).

Ялан - шырав! Ялан - çĕннийĕ!

Мĕн канăва тухичченех!

Вăл пулнă самана сассийĕ!

Алла тăк — хăй вырăнĕнчех!

Учитель-фронтовик Георгцй

Трофимович тесен, эпир —

Шетмĕ енсем — пĕлетпĕр пурте:

Хăварнă вăл çапах та йĕр

Поэзире. "Çырни сахал ун —

Тесе ÿпкелеме пулать.

Анчах вăл... пурăнман кахаллăн!

Ăна кашни савса вулать:

Сăввисене... çу пек шăратнă!

Пиçсе çитмесĕр васкаман

Тÿрех редакцие чупмашкăн!

Çынпа та пулнă вăл аван:

Калаçнă, кулнă е шÿтленĕ,

Анчах та... виçине тытса.

Черкке те, май пулсан, çĕкленĕ

Пире пурне те ыр сунса!

(Малалли пулать).