Унăн ячĕ чĕрĕ ĕмĕре!

Унăн ячĕ халăх асĕнче!

Ан манăр, тархасшăн, ыйтатăп:

Манма юрамасть юрăçа.

Вăл - пирĕн шăпчăк,

Вăл - çутă çăлтăр.

Виталий, парсамччĕ пархатар!

Сана асра тытса

Ырă ĕç тăвар -

Сан палăку умне

Сукмак хывар!..

Виталий! Сан яту чаплă,

Чун хавалу пуян та аслă,

Ĕçÿ, чăнах та, пархатарлă,

Вăл ĕмĕр пултăрччĕ мухтавлă!

 

Тĕнчери мĕн пур чечек - 

Сирĕн валли, Виталий!

Чунран тухан ăш сăмахсем - 

Пурте Сирĕншĕн вĕсем.

 

Юрăç ĕçĕ çăмăл мар - 

Туртать-çке вăл чи йывăр лав.

Тĕрлĕ юрă шăрантарать,

Итлекенсене савăнтарать.

 

Чунна парса вăйна хунишĕн,

Çĕр-шывшăн пысăк ĕç тунишĕн,

Юрласа кăмăла çĕкленишĕн

Тавах, Виталий, сана!

Трак районĕ пит пуян

Пултаруллă çынсемпе:

Юрă-сăвă çыракан,

Сăн ÿкерчĕк тăвакан,

Юрлама юратакан,

Сцена çинче вылякан…

 

Вĕсенчен чи маттурри,

Талантли, пултарулли,

Юрă шăратаканни,

Чуна тыткăнлаканни –

Петров Шăнкăрч-Витали –

Кĕçĕн Шетмĕ сар каччи.

 

Вăл юрланă  Чăвашра,

Венгрире те Польшăра,

Италире, Мускавра,

Германире, Хусанта,

Францире, Чулхулара,

Чĕмпĕрте те Кавказра.

 

Чăваш халăх юррисем,

Вырăс халăх юррисем,

Арисем те романссем –

Вăл юратнă юрăсем –

Пурте халăх чĕринче,

Чăваш ен кун-çулĕнче.

Кĕçĕн Шетмĕ ялĕнче

Сивĕ хĕл уйăхĕнче

Çуралать пĕр сар ача,

Уçă саслă хай ача.

 

Шăнкăрч теççĕ çуралсан,

Пултăр кайăк пек таса,

Ырă-сывă та маттур –

Ан çулăхтăр чирпе мур.

 

Чăннипех те кайăк пек

Çитĕнет Виталий тек.

Юрăç пулать çитĕнсен,

Шăрантарать юрăсем.

 

Унран чаплă юрăç çук

Пирĕн Трак тăрăхĕнче:

Ăмсанмалăх сасси пур,

Мухтанмалăх чапĕ пур.

 

Хисеплетпĕр чĕререн

Хамăр ентеш-пиччене.

Тухчăр татах Трак енрен

Уçă саслă артистсем.

Пурнăçу сан тикĕссĕн килмерĕ,
Эс тимлерĕн чун-чĕреренех.
Тÿсĕмлĕн вĕрентĕн те вĕрентĕн
Пулаясчĕ ырă çын тесе.
 
Янкасра пуçламăш шкул пĕтертĕн,
Тăсрăн пĕлĕвне эс Упире.
Малалла Çĕрпÿ шкулне тĕллерĕн,
Каярах вара — ФЗО шкулне.
 
Типографие те кăмăлларăн,
Самарта та эс Шупашкарта.
Çак ĕçе чунна парса тăрмашрăн, —
Çавăнпа пуль тивĕçрĕн сума?!
 
Асăрхарĕç çав, чăн, асăрхарĕç
Пултаруллă, çамрăк маттура.
Ахальтен-им "Сунтал" йыхравларĕ
Хăй патне ĕçе, сана шанса.
 
Ун яваплă секретарĕ пултăн
Манăçми талантлă ĕçсемпе.
Вулакансене пурнма ăс патăн
Çут малашлăх пултăрччĕ тесе.
 
Пархатарлă çынсемпе туслашрăн,
Хавхалантăн хăв ĕçÿсемпе.
Пулăшу кÿме пайтах тăрмашрăн
Шанчăк паракан çамрăксемпе.
 
Халăх умĕнче яваплăх туйрăн,
Çыртăн çынлăх, паттăрлăх çинчен.
Çирĕм пĕр çултах вĕт-ха кăлартăн
Чаплă сăввусен кĕнекине.
 
Самана шăпи унта сăнланнă.
Савнă çĕр-шывун ĕçчен çынни —
Ак кама эс ывăнми мухтанă,
Сăввусем сан, чăн та, манăçми.
 
"Чуншăн çывăх сăввăма" ĕç халăх
"Тараватлă йышăнсан" вара
"Эп телейлĕ пулăттăм", — çыратăн
Тивĕçлĕ хак парасса шанса.
 
Умлăн-хыçлăн кун çути ав курчĕç
"Иккĕмĕш парне", "Парне", "Михаç".
"Ĕç хĕрарăмĕ" те "Хатĕр пул” журналĕ,
Ав "Сунтал" та пулчĕç ăш вучах.
 
Эс прозаик та, эс — очеркист та,
Чаплă куçаруçă та эсех.
Уççăн чăвашла çырса янратрăн
Пушкин, Лермонтов сăввисене.
 
Джамбул, Шевченко, Маяковский
Ĕçĕсем те куçрĕç чăвашла
Эс тăрăшнипеле, ентешĕм,
Уншăн чыс та сум, мухтав сана!
 
"Катя" калавна епле хакламăн,
Е "Телейлĕ çул" текеннине?
Ĕçсенче ыр çынсене мухтарăн,
Пурăнтăн таса ĕмĕтсемпе.
 
Юратупала хĕмленнĕ çамрăк,
Чăмăртарăн шанчăклă çемье.
Килсе тухрĕ темшĕн тĕрĕс марлăх,
Çын элекĕ хур турĕ сире.
 
Айăпсăртанах "халăх тăшманĕ"
Туса хучĕç ирсĕр суеçсем.
Сив тĕрмерен тухасси пулмарĕ —
Хупăнчĕç унтах сан куçусем.
 
Шантăн эсĕ, шантăн çирĕп-çирĕп:
Чăнлăх çиеле тухать тесе.
Тĕрĕслĕх чăннипелех çĕнтерчĕ —
Тавăрчĕç таса ятна санне.
 
Ĕмĕрÿ питех кĕске-çке пулчĕ,
Вăтăр виçĕ çул — ытла сахал.
Пур пĕр сумлă ĕçÿсем сан юлчĕç,
Вĕсене ырлать-ха вулакан.
 
Ĕмĕр-ĕмĕр пурăнăн асра эс,
Чыслă та ыр çыннăмăр, Янкас.
Сан ятпа таса ĕçсем тăватпăр,
Пĕрлĕхре туптатпăр ăс, вăй-хал.