Тен, кам та пулин пĕлет? — 
Эп пĕлместĕп чăннине, — 
Аптрашки тесе чĕнет 
Кинеми хăй кушакне. 

Шурă юр пÿрт тăрринче 
Ирĕлет — тумла тумлать.
Шăнкăрч çĕнĕ вĕллинче 
Тем тăвать — кĕрет, тухать...
Аптрашки юпа çинче 
Чăр-чăр-чăр пăхса ларать. 

Шăнкăрча ши! шăхăрса 
Тусĕ чĕнчĕ сад хыçне. 
Çав тери савăнтарса 
Ячĕ ку Аптрашкине — 
Йăпăр-япăр хăпарса 
Кайрĕ вăл вĕлле патне.

Вĕллене пуçне чиксе 
Тĕрĕслесшĕнччĕ иккен. 
Пуçĕ ларчĕ хĕсĕнсе 
Шăтăкра кĕтмен çĕртен. 

Кама тульккă? Мĕн кăна 
Каламарĕ Аптрашки! 
"Çав та кирлĕ-ха сана!” — 
Лăх-лăх кулчĕ кил кăркки.

Шăшисем паян çимен. 
Вĕсем çăкăр пĕçермен, — 
Килте çăнăх çук иккен. 

Шăшисем калаçнине 
Илтрĕç Петĕрпе Яким. 
Шыв арманĕ пÿрт умне 
Туса лартрĕç. Йывăр-им? 

Шăнкăр-шăнкăр шыв юхать, — 
Шыв арманĕ авăрать. 

Шăши тырă хутаççи 
Йăтнă — армана каять. 
Ун çине кушак аçи 
Кантăкран пăхса ларать.

Эп пĕррехинче çулла
Пушă вăхăт пур чухне
Курмалла, уçăлмалла
Кайрăм Сурăм вăрманне.

Шĕвĕр чăрăш тăрринче
Куккук уççăн авăтать.
Ÿкнĕ йывăç çумĕнче
Курăнса темскер выртать.

"Тем те пулĕ вăрманта”, —
Терĕм — хамăн чун хăрать.
Пырса пăхрăм та, унта
Ват упа хуп турттарать.

Петĕм йĕкелпе ăна —
Вăратма мар, хăратма!
Сиксе тăчĕ те, мана
Тытăнчĕ хăвалама.

Эп тÿп! ÿкрĕм такăнса,
Хайхискер хăлаçланса
Чупса пычĕ ман пата.
Ураран вăл кашт хывса

Илчĕ вĕркĕчлĕ атта.
Пăхса тăчĕ ун çине.
"Атти, — терĕ, — пит паха”.
Хĕстерсе хул хушшине
Кĕрсе кайрĕ чăтлăха.

"Ыр сунса мăнуксене
Хăналам-ха”,— терĕ те,
Кинеми пыл чĕресне
Кайса лартрĕ кĕлете.

Уявра Çĕмĕрлерен
Çитрĕç ун мăнукĕсем.
Хыпаланчĕ. "Кĕлетрен, —
Терĕ, — пыл илсе килем”.

Ак мĕн курчĕ: чĕресе
Кĕрсе тулнă кăткăсем.
Пур кăткин те пыл çисе
Вараланнă пичĕсе