Кирек кам патне те инкек
Куçа курăнмасăр килет.
Каçать урам урлă инке, –
Васкать те ĕçе,
Те киле.…

Вăл ÿкрĕ ури шуçнипе
Пăрлак çул çине пĕвĕпе.

Тăратрăм йăтса инкене.
“Ах, хуçрăм пуль, – терĕ, –
Хула”.
Инкен çул çинчи инкекне
Пайлас килчĕ ман
Çурмалла.

Вылятрĕ вăрăм хÿрине
Ун чух чакак чакаклатса.
“Çыру килет”, –
Тесе анне
Каларĕ ун çине пăхса.

Халь çук анне.
Çапах манман
Эп вăл тахçан каланине.
Тăван яла чунтан-вартан:
“Эс, – терĕм, –
Иккĕмĕш анне”.

Вылятрĕ вăрăм хÿрине
Чакаклатса чакак паян.
Савса пăхса эп ун çине:
“Çыру килет, – терĕм, –
Ялтан”.

Çĕпĕр çĕрĕ ытла та-çке тулăх, –
Тем те çырнă,
Ÿкернĕ кун-çул.
Катаран сарăлса выртать шурлăх, –
Шурлăх урлă выртать чуллă çул.

“Хура çул” ятлă вăл.
Ячĕ унăн
Тухас çук самана асĕнчен.
Асăнмалăх ăна Сталин тунă
Хура тарлă этем шăмминчен.

Кин кĕртсессĕн Урине
Илтрĕ хуняма ятне.
Чĕрне вĕççĕн Урине
Пырса пăхрĕ каçхине
Çамрăксем çывăрнине.
Кинĕ чăмăр пĕççине
Хунă ывăлĕ çине.

Кинĕ çук чух ывăлне:
“Петĕр, – терĕ Урине, –
Ман шутпа, ку кин пире
Нимĕн чухлĕ те хывман.
Тем пекехчĕ çимĕкре
Урăх кин тупса парсан”.

Ăш хыт хыпрĕ,
Хал пулмарĕ
Пăрăнса иртме.
Санран эпĕ,
Чун чăтмарĕ,
Ыйтрăм шыв ĕçме.

Шыв ĕçтертĕн –
Халь аптратăп.
Мĕн тăвас-ха ман?
Тĕлĕкре те эп ыйтатăп
Шыв ĕçме санран.