Хĕвелпе хĕмленет çуркунне,

Ăшшипе чĕрĕлет çутçанталăк.

Чечекпе эрешлет вăл тумне,

Ырлăхра савăнать вĕçен кайăк.

Çулсерен хитререх тăван ен

Çĕнĕлет чун юратнă тавралăх.

Илĕртет яланах ытамне,

Кăмăлтан уçăлма кунта лайăх.

Çу уявĕ мăнаçлăн янрать,

Çĕнтерỹ чĕрере асăнмалăх.

Сĕм вăрман чĕрĕлсе пуç таять,

Салтаксем пек патвар-çке юманлăх.

Пурнăçра ырă вăй çĕнтерет

Çĕкленме сăлтав пур халь пурин те.

Ăшăтать чĕрене çут тивлет,

Сар хĕвелĕн телейлĕ кулли пек.

(Çĕнĕ Выççăлккă ялĕнче пурăнакан Вера Васильевна Матвеевана Аслă вăрçă асапĕнчен кил-йышăма хăтарнишĕн чысласа)

Аппаçăма эп сăнласшăн,

Килĕр, çепĕç сăмахсем!

Кил-йышна тертрен çăласшăн

Иртрĕç сан яш кунусем.

Вăрçă хирĕ кĕр-кĕрлерĕ,

Вилĕм сапрĕ çĕр çине.

Çын куççулĕпе тĕрлерĕ

Гитлер хăйĕн тĕррине.

Вăтанмас чуна уçмашкăн —

Умран нишлĕх çухалман.

Ялсенче çỹрерĕ кашкăр —

Хăратма арçын пулман.

Лашапа çĕр сухаланнă,

Тытнă эс чĕлпĕрĕнчен.

Çĕнтерỹшĕн нушаланнă

Манса çамрăклăх çинчен:

Тырă вырнă, утă çулнă,

Парăннă сана вăрман.

Пахча тунă, шоссе тунă,

Шикленсе нихçан ларман.

Эх, хăçан-ши эсĕ каннă?

Кил-йыш та ыйтать йĕрке.

Пăрчăкан пек кускаланă

Пĕр тухмасăр ирĕке.

Шак, шаккаççĕ ултă кашăк...

Тĕлĕнеп халь шутласан.

Тарнă çумран юрă-ташă...

Çапла килчĕ шăпу сан.

Сăпка хуçи те эс пулнă,

Эпĕ выртнă-çке унта.

Хăв кулсан, тен, эп те кулнă.

Çумра çывăх çын пуртан.

Апая шеп хисепленĕ,

Йăл тутам халь сарăлать.

Фермăра чысне çĕкленĕ,

Шутласан, пыр капланать.

Костер-курăк хулăн, çỹллĕ,

Çулатчĕ вăл ир-ирех.

Пулин хамăр ача пỹллĕ,

Вăй-хал хунă пурпĕрех...

Сар хĕвеллĕн çуталатăн

Эс, аппаçăм умăмра.

Юратуллăн пуç таятăп

Ыр тунишĕн пурнăçра! В

ăрăм ĕмĕр эсĕ пурăн

(Илчех вăрçă сывлăха)!

Кунĕсем пурах-мĕн Туррăн,

Çăтмах та парнелĕ-ха!

Районти вулавăш ĕçченĕсене халалласа

Сахал мар кĕнеке тусĕсем,

Черетре те нумай кĕтекен...

Вулама юратаççĕ вĕсем —

Пурнăçра усси пур кĕнекен!

Вулаканшăн уçах алăксем,

Кулленех паллашма çĕннипе,

Ытларах кăмăллаç çамрăксем —

Тăван килĕ пекех чăннипе.

Килсерен кĕнеке çутипе

Ăнтăлатпăр пĕлỹ тĕнчине.

Тан утатпăр кун-çул уттипе —

Ыр сунатпăр мĕнпур çынсене...

Кĕнеке пире ăс панăран,

Малашне те вулар юратса...

Вăл ан кайтăр нихçан алăран —

Тăтăр çак пурнăçа çутатса!

— Ват çынна никам юратмĕ

Тетĕр пуль?.. — Сахар, ай, ай

Сăмахне ахаль тапратнă

Сухалне якатнă май.

— Пиччене кулак тĕп турĕ

Пĕр кĕрхи çанталăкра...

Ах хама та нимĕç турĕ

Муталарĕ тамăкра.

Эп гранатăпа çунтартăм

Урса кайнă тăшмана.

Çавăн чух кăна çухатрăм

Хамăн сылтăм урана.

Халĕ те çĕрсех пĕтмен-тĕр

Ман ура лаппи унта.

Ун чухне эпир пинтен пĕр

Сывă юлнă ушкăнтан.

Тата тепĕр асăнмалăх

“Парне” юлчĕ нимĕçрен.

Кĕр çитсен сивви туймалăх

Пур осколка ман пĕçре.

Тимĕрпе чукун туптарĕ

Çĕр çăтман мĕлке нихçан

Çĕнмелле пек çирĕп тирлĕ

Хăйне туйнă пуль, айван.

Шур тăхлан — чĕрешĕн сивĕ,

Йывăр хурçă — пусарать.

Туслăхра — этем сып-сывă,

Çĕнтерет вăл пусмăра.

Ман тăван çĕршывăм аслă,

— Мĕнпур халăхшăн — телей.

Пурăнма чĕнет хаваслă,

Мирпе туслăх вăл пиллет.

Эпир туслăн калаçатпăр

Тĕрлĕ халăх чĕлхипе.

Çавăнпа та мухтанатпăр

Пур тăван пĕрле чухне.

Çĕр çинчи пур тĕрлĕ халăх

Çирĕп туслă пулнăран,

Вăйлине курса яланлăх

Тăшман пĕтрĕ паянтан.

Эп ак халь те пурăнатăп...

— Терĕ, çитмĕлти мучи —

Савăнса ăна тăнлатăп —

Вăл хăех телей хуçи.

Авкаланчăк Шетмĕ юхан шывĕ

Ик енпе кашлаççĕ хăмăшсем.

Ирĕн-каçăн канăçсăррăн темшĕн

Куç илмеççĕ сăрă хумсенчен.

Шĕмпĕлт-шĕмпĕлт чỹхенсе ачашшăн

Хумĕсем лăпкаççĕ хăмăшне.

Мĕн курни-илтни çинчен васкавлăн

Пĕлтереççĕ пулĕ пĕр-пĕрне.

Çырана,ав, чăнкине пăхмасăр

Сырса илнĕ çĕр чĕкеçĕсем.

Вĕсене пачах асăрхамасăр

Ярăнса вĕçеççĕ чарлансем.

Йывăçсем те пуçĕсене тайнă,

Саламлаççĕ тейĕн илеме.

Савнă Шетмĕ, чăннипех мухтавлă

Çулна тыт мал ĕмĕтсем патне.