Ăш хыт хыпрĕ,
Хал пулмарĕ
Пăрăнса иртме.
Санран эпĕ,
Чун чăтмарĕ,
Ыйтрăм шыв ĕçме.

Шыв ĕçтертĕн –
Халь аптратăп.
Мĕн тăвас-ха ман?
Тĕлĕкре те эп ыйтатăп
Шыв ĕçме санран.

Эп сансăр тунсăхланине
Сисет-ши сан чуну?
Ялан тухать ман куç умне
Хĕр чухнехи сăну.

Мăнукусен сассисемпе
Шавлать-тĕр кил-çурту.
Пĕлсем:
Мĕн ĕмĕр тăршшĕпе
Эс – манăн ырату.

Çÿреттĕм Филадельфи штатĕнче. 
Ентеш вĕçетчĕ уçлăх анинче. 
Кусем тек Андриян çинчен тĕпчеççĕ, 
Хăш халăхран вăл теççĕ, кам вăл 
Мăнкамăллăн калап:
— Чăваш.
— Мĕнле чăваш?
— Совет çынни. Çунатлă çын. Чăваш. 
Çăлтăр татма пултаракан юлташ.

Пуç тайрăм Миланри театра. 
Хамăр Натюш ташларĕ-çке, ара! 
Балет турри, шур акăш, лĕпĕш теççĕ, 
Хăш халăхра çуралнине пĕлмеççĕ. 
Хĕпĕртесех калап:
— Чăваш.
— Мĕнле чăваш?
— Совет çынни. Асамлă çын. Чăваш.
Турăсенчен ирттерекен юлташ.

Тем тавлашать ик çын Уругвайра.
Иккен, сăлтавĕ пирĕн Ухсайра. 
Хайхискерсем мана ярса илеççĕ: 
Хăш халăхран çак чаплă сăвăç теççĕ.
Пуçа ухса калап:
— Чăваш.  
— Мĕнле чăваш?
— Совет çынни. Сăпайлă çын. Чăваш. 
Чун-чĕрене хĕм сапакан юлташ. 

Аван-и, аппа?
Час-час пыма
Çĕпĕр çулĕ пĕртте çывăх мар.
Малтанах сана пĕлсе тăма
Çырупа яратăп пĕр хыпар.

Хам сывах-ха.
Манси карчăкки
Йăлт çухатнă ватлăх канăçне.
Тĕл пулсан,
Пĕрмай мана хайхи:
“Кин тăвасчĕ, – тет, –
Чăваш хĕрне”.

Кĕр çитсессĕн манси каччипе
Хĕр пăхма пыратпăр Чăваша.
Кун çинчен эс
Сар кĕр çитеспе
Кăшт систер сăмах май ял-йыша.

Кĕтмен-çĕртен йăлтах арканнă
Анне телейĕ çуркунне.
Çуратнă та –
Тÿрех чăрканă
Мăн хуйхăпа мана анне.

Ÿкернĕ вăл асăрхамасăр
Куççуль тумламĕ ман çине.
Эй, Турăçăм, паян та майсăр
Туятăп ун йывăрăшне.