Телей эп
шырарăм çын утнă çулпа,
Анчах та
шăпа манна печĕ чулпа.
Пĕлмен
çав… Пĕлмен – хывмаллаччĕ çĕн йĕр…
Анчах та,
чĕреçĕм, ытлах эс ан йĕр:
Иртет
ырату… Иртет ырату!
Малта –
Çут хĕвел пек çиçен ЮРАТУ!
Телей эп
шырарăм хам тунă çулпа,
Анчах та
ШĂПА каллех печĕ чулпа.
Пĕр утăм
кăна тумаллаччĕ те ман –
Хăрарăм
пуль çав ытлашши пуласран…
Каллех
ырату… Каллех ырату!
Малта –
Çут хĕвел пек хитре ЮРАТУ!
Телей эп
шыратăп: умра – çулсăр çул…
Телей эп
шыратăп: умра – чунсăр чул…
Мĕн
чухлĕ? Мĕн чухлĕ тата утмалла?
Мĕнле
асап витĕр тата тухмалла?..
Каллех
ырату… Хăрушла ырату!
Малта –
Çут хĕвел пек таса ЮРАТУ!
Телей эп
шырарăм çын утнă çулпа…
Телей эп
шырарăм хам тунă çулпа…
Телей эп
шыратăп: умра – çулсăр çул…
Телейлĕ
çул пултăр! – тесе алă сул…
Умра –
Çут хĕвеллĕ таса ЮРАТУ!
Унта
çитиччен – эс пĕлмен ЫРАТУ…
28.03.96
