Янкас шкулĕнчи пĕрремĕш вĕрентекене — Василиса Ивановна Иванована аса илсе 

Эпĕ пĕрремĕш класа 
пынине илеп аса: 
йышăнтăн анне пекех — 
иккĕмĕш анне пекех... 
Сан яту — Вĕрентекен, 
эс пире: "Вĕрен!" текен. 

Пĕлÿ патăн тăрăшса — 
ÿстерме пирĕн ăса. 
Çĕр-шыва юрăхлă çын 
пулма тивĕç пур кашнин... 
Сан яту — Вĕрентекен, 
эс пире: "Вĕрен!" текен. 

Ватăлса пырать кун-çул — 
хăш чухне тухать куççуль. 
Йăпатма ачун чунне 
Кĕç тухатăн куç умне...
Сан яту — Вĕрентекен, 
эс пире: "Вĕрен!" текен. 

Хамăр халь пурăннă чух 
сана манса каяс çук. 
Ырă ĕçшĕн Тавтапуç — 
ĕмĕр-ĕмĕр Таймапуç... 

Н.Ершов

Тараватлăн чĕнет хăнана уй хапхи
Тараватлăн кĕтет униче...
Таймапуçăм сана, тăван ялăм, тавси!
Эс вырнаçнă кашнин чунĕнче.

Анкарти хыçĕнче — яштака хурăнсем,
Анкарти хыçĕнче — тарăн вар...
Ачаран илĕртсе астаран вырăнсем
Чĕннĕ чух — ун патне таврăнар.

Тарăн вар тĕпĕнче — пĕчĕк çеç юхан шыв,
Хум çапать унăн ик çыранне.
Çĕмĕрес тĕллевпе урăх çул çук, ан хыв —
Тÿрлетеймĕн тек çĕр суранне!

Эп яланах çапла калап: 
— Юрать-ха килĕм пур... 
Кил-çурт пуртан — çапла калап: 
Çĕнеймĕ вилĕм-мур! 

Эп яланах çапла калап: 
— Юрать-ха мăшăр пур... 
Мăшăр пуртан — çапла калап: 
Чунра ман ăшă пур! 

Эп яланах çапла калап: 
— Юрать-ха атьсем пур... 
Вĕсем пуртан — çапла калап: 
Ÿстер те — телей кур!

Чĕпĕтет кăрлачĕ — 
Хÿхĕм хĕл илемĕ. 
Çав çула кăларчĕ — 
Халь киле килем-и? 

Манăçми кĕтесĕм, 
Палламасăр ан тăр. 
Хирĕç тух, аннеçĕм — 
Чун кăштах лăплантăр. 

Пулаймарăм хам та 
Ялăмра пĕр хушă... 
Хăш чухне чăнах та 
Кÿрейместпĕр усă. 

Кĕт, çуралнă хутлăх! 
Тăван çуртăм, пурăн! 
Патăр сана хÿтлĕх 
Атте лартнă хурăн...

Яланхи пек çанталăк
лайăх пултăр паян...
Саншăн уçă халь алăк —
Хăв шкула эс каян.

Эх, илемлĕ-çке кунĕ:
Йăл кулать çут хĕвел...
Хĕпĕртет ача чунĕ:
Пĕлÿ кунĕ — телей!

Çуллахи вăхăт шунă —
Иртнĕ вăл ахаль мар...
Çу каçа эс те тунă
Ырă ĕç сахал мар.

Эх, илемлĕ-çке кунĕ:
Йăл кулать çут хĕвел...
Хĕпĕртет ача чунĕ:
Пĕлÿ кунĕ — телей!

Сывлăхна çирĕплетнĕ —
Чăнахах эс маттур.
Вăй-хална тĕреклетнĕ —
Вĕренме йăлт май пур.