Кĕçĕн Шетмĕри хăйсен ентешне,Чăваш халăх поэтне — Юрий Сементере хисеплесе пỹлĕм уçнă уяв ячĕпе

Савса ỹстернĕ Кĕçĕн Шетмĕ

Вышкайсăр чаплă çынсене.

Тавралăхпа хитре çĕнетнĕ —

Куратпăр паллă сăнсене.

 

Çак хутлăх вăл —сăваплă вырăн,

Çавна чун-чĕрепе сисеп.

Ентешсене чыслаççĕ ыррăн,

Тăван кĕтес парни — хисеп.

 

Паян кунта уçатпăр пỹлĕм—

Сементере сума суса.

Вăл музеех пулать, ав, ỹлĕм,

Хăварăпăр халь — тав туса.

 

Асрах тытать çуралнă Танăш.

Мухтавлă улăпĕсене.

Тăванлăх туйăмĕ ку — шанăç:

Манса каймаççĕ вĕсене!

 

 Çĕнĕ Выççăлккăри Николай Ункай сăвăçа халалласа

Пĕлĕр — Микулай Улай.
Эс те хăвна ят шыраттăн,
Тупрăн — Микулай Ункай.

Çĕнĕ Выççăлккă — ялу сан,
Манăн — Упи ен Янкас.
Ункăпа Çавал татуллăн
Пĕрлешсе юхаç хавас.

Çавăн пек эпир те иккĕн
Тахçанах çывăх туссем...
Ватăлмашкăн вăхăт çитнĕ —
Пурпĕрех пырар ÿссе...

Эп çĕн ят улăштарсаттăм,
Халĕ — Николай Янгер.
Эс ан улăштар, тархасшăн,
Ман пек "çылăха" ан кĕр!

Районти тĕп культура çурчĕн "Трак ен” фольклор ушкăнĕн ертÿçине
Николай Михайлович Никонорова 

Талантна таçта та эс кăтартрăн —
Яту кайрĕ сан Тюмень таран.
Тăван ен чысне çÿле хăпартрăн —
Халăхшăн мĕн пур вăйна паран...

"Трак ене” мала эс кăларатăн — 
Тĕлĕнтертĕр аслă Мускава. 
Тарăн йĕр хăв хыççăн хăваратăн —
Чăннипех те тивĕç мухтава!

Ырă тĕслĕх те эс шутланатăн —
Вĕрентетĕн çамрăк ăрăва...
Чунупа çунатăн — вутланатăн —
Тав тăваççĕ Никонорова!

Яланах пире эс кирлĕ пулнă —
Малашне те пулăн пирĕнпех.
Несĕлсен хăвачĕ санра юлнă —
Усса кĕрĕ вăл ĕмĕрĕпех!

Вера Филипповна Алексеева юрăçа, 70 çул тултарнă май

Савнă ен сан — Шетмĕ ен, 
Тăван ял сан — Типçырма. 
Сĕткен илнĕ Шетмĕрен, 
Çавăнпа сăну — çырла. 

Эс çуралнă юрлама —
Ĕмĕрлетĕн юрăпа.
Сăмах çитмĕ ырлама —
Тав тăватăп Турăпа.

Чаплă юрлама пĕлни —
Пурнăçри паха тупра.
Ан çухат пули-пулми,
Сассуна ялан упра.

Эс хĕрарăм телейне
Тупса куртăн чăн, ара.
Мăшăрун юбилейне
Пырса курăп Кăнара.