Хайламашкăн сăвă çăмăл тетĕр-и? 
Çумăр пек сăмах вăл тÿперен ÿкмест. 
Каласассăн уççăн, килĕшетĕр-и? 
Çухалсан пĕр рифма ыйхăм та килмест. 

Пурпĕрех, ан тивĕр, çырасах килет — 
Тăвалла кăна тăр çулĕ сăвăçсен. 
Çут тĕнче кĕтречĕ чуна илĕртет, 
Ыткăнать Пегасăм уçлăха чĕнсе. 

Чарма çук ăна тек турăсăр пуçне, — 
Пĕртен-пĕр хуçа вăл вутлă çĕмренсен. 
Чурине памасть-çке пĕр усма пуçне, — 
Чулланать чĕри ун канăç çĕнтерсен. 

Апла-тăк, Пегасăм, çунатна сарсам, 
Ывăнми ялан эс пулччĕ вĕçевре! 
Сăвăçна вăй-хал та çут тивлет парсам, 
Унсăр хăв çухалăн ĕмĕр-ĕмĕре!

Тăван чĕлхе — чĕре чечекĕ,
Уй-хир, вăрман та вăл, çаран.
Вăл ытарми юман кĕрнекĕ...
Нихçан та тухмĕç асăмран.

Чăваш сăвви, юмах-халапĕ
Тăван çĕр-шывшăн чи хакли.
Янрать паян чăвашăн чапĕ,
Вăл мĕскĕн мар, сывлать туллин.

Ик-виç чĕлхе чăваш пĕлет халь,
Эппин ăс-тăн та анлăрах.
Йăхне-ратне çеç ан сивлетĕр,
Пулман нихçан чĕлхи кăра.

Астăвакан çакна пурах-тăр:
"Чăвашăн сăмахне мансан,
Чăвашăн çăмахне те мантăр!"—
Çапла каланă авалтан.

Тăван чĕлхемĕрĕм — çĕр-шыв вăл,
Тăван аннемĕр евĕрех.
Çакна туйсан кашни хĕр-ывăл
Телейлĕ пулĕ ĕмĕрех!

Тимлĕн йĕрсене пытарчĕ 
Çĕрлехи тăман. 
Шурă пир витсе хăварчĕ 
Çывăрать вăрман. 

Çĕнĕ юр çинче пин тĕслĕн
Таш ташлать шевле. 
Юмах тĕнчине çитернĕн 
Чунăма çĕклет. 

Каçăхса кайса итлетĕп 
Хĕлĕн шăплăхне. 
Юр пĕрчи пулса вĕçетĕп 
Унăн ĕшнине. 

Эх, хитре те хĕл парнийĕ —
Вăл хăват хушать! 
Сăввăмăн та, кур, йĕркийĕ 
Çăмăл çырăнать.