16
Çав йăхранах (виç сыпăк пулĕ)
Туркова Наçтан хĕр ачи –
Ячĕпеле калас тăк – Оля -
Шкулта вĕреннĕ çулсенчех
Çырма пуçланăччĕ: тĕрленчĕк,
Заметка, очерк хаçатра
Пĕр хушă тăтăш пичетленчĕ.
Вăл пулнă ун чухне шутра.
Поэзи патнелле те туртăм
Сисĕнкелетчĕ хушăран.
Сăввисене... Вуланă-курнă.
Анчах... хăçанччĕ-ши... Хăçан...
Ăна паян аса илме те...
Çук! Çук! Тăванăмсем! Пулмасть!
Çĕннисене вуласчĕ питĕ! —
Эп мар, хăй айăплă: çырмасть!
17
Упа çырма енне каçар-и...
Пулин çул-йĕрĕ сакăлта.
Чăваш поэзин сумлă арĕн
Çуралнă вырăнĕ кунта.
Вĕрентекен тата тĕпчевçĕ,
Чĕлхемĕрĕн наукисен
Чăн кандидачĕ! Чăн поэчĕ!
Çапла. Вăл - Петĕр Яккусен.
Шăпа темле те тĕрĕслерĕ
Çав пултаруллă ачана...
Анчах та пурпĕр вăл... «вĕçмepĕ»
Çитес тесе çав... "маччана"
Хăш-пĕрисем пек: çав ултавлă,
Элеклĕ ,çул çине.тăрса.
Шăп çавăнпа вăл хăй куçарнă
Сăваплă Библи пек таса!
|