Тавралăхĕ хитре: 
Куç умĕнче — шап-шур... 
Хаваслă сăн-питре — 
Илем теме май пур. 

Çанталăкĕ чипер: 
Кăштах çăвать-ха юр... 
Çитес çĕре — çитер! 
Тесе утма май пур. 

Ял халăхĕ ĕçчен: 
Ĕçре кашни маттур... 
Пуян пулас тесен — 
Кунта татах май пур. 

Патшалăхĕ лăпках: 
Мал ĕмĕтлĕ — ав, кур... 
Çав шухăш-кăмăлпах 
Чăн пурăнма май пур.

Сывă чух вăхăт çук ватăлма,
Майĕ пултăр ĕçпе савăнма.
Иртнине хумханса асăнатпăр,
Малалла тинкерсех ватăлатпăр.

Пурнăçра çул кăтарттăр ватти,
Ватă çынсăр килте мĕн латти.
Кашни çыншăн пĕрех килет ватлăх,
Пурнас мар çĕр çинче кăшт çеç ятлăх.

Тарпа пиçнĕ эсир яшлăхра,
Ма ыр кун курас мар ватлăхра?
Ахальтен каламасть-çке ват халăх:
«Ватлăхра ан пăрахтăр патшалăх!»

Сывлăх пултăр сире, Ватăсем!
Ырлăх пултăр сире, Ватăсем!
Ман усрасчĕ сире ватăлмасăр,
Пурнăçран нихăçан татăлмасăр.

Ик куç тулли — çывăх тăван...
Тăван пулсан — чунра аван.
Савăнтарать тăван пурри,
Асра юлать ташши-юрри!

Сĕтел тулли — ĕçме-çиме...
Йышпа пулсан — кĕрлет ниме.
Савăнтарать тăван пурри,
Асра юлать ташши-юрри!

Йĕри-тавра — хăна-вĕрле...
Хăна пулсан — эпир пĕрле.
Савăнтарать тăван пурри,
Асра юлать ташши-юрри!

Çаплах кĕтетпĕр аттене
Аттен паян — çуралнă кунĕ:
Тултармаллачĕ — шăп çĕр çул!
Вут-вăрçăра вăл пуçне хунă —
Пулман киле килме ун çул.

Аттен паян — çуралнă кунĕ:
Вăл пурăннă — шăп хĕрĕх çул!
Вут-вăрçăра ун юхнă юнĕ —
Ăна телей пӳрмен кун-çул.

Аттен паян — çуралнă кунĕ:
Аттесĕр эпĕр — утмăл çул!
Пирĕнпелех пурнать ун чунĕ,
Аса илсен — тухать куççуль.

Аттен паян — çуралнă кунĕ:
Тултармаллаччĕ — шăп çĕр çул!
Атте çуртийĕ ĕмĕр çунĕ:
Кĕтетпĕр, кĕтрĕмĕр кун чул...

Кăнтăртан вĕрсен ăш çилĕ,
Атăл лăпкăн хумхансан,
Шупашкарăмăрăм çийĕн
Ирхи кĕвĕ пуçлансан —
Ытарма çук ырă туйăм
Вăй-хăватлăн çĕкленет..
Чăваш Ен — тăван çĕршывăм
Ешерсе чечекленет!

Ирсерен Мускав сассийĕ
Ĕçлеме вăй-хал парсан,
Чăвашсен те пулассийĕ
Тата чаплă çывхарсан —
Ытарма çук ырă туйăм
Вăй-хăватлăн çĕкленет...
Чăваш Ен — Тăван çĕршывăм
Ешерсе чечекленет!

Çут хĕвелĕмĕр хĕлхемлĕн,
Тараватлăн йăл кулсан,
Уй-хирте тыр-пул илемлĕн
Хумханса ларать пулсан —
Ытарма çук ырă туйăм
Вăй-хăватлăн çĕкленет...
Чăваш Ен — тăван çĕршывăм
Ешерсе чечекленет!