|
Тăван чĕлхе
Тăван чĕлхе... Епле вăл ырă!
"Аннемĕр" евĕр илтĕнет.
Тупсан та инçетре ăш вырăн,
Тăван чĕлхе ялах чĕнет.
Вăл ют çĕрте татах та уçă,
Чĕре мăнаçлăрах тапать.
Тăван чĕлхе — ăс-тăн çăл-куçĕ,
Ачаш сасси вăй-хал парать.
Тăван чĕлхе — чĕре чечекĕ,
Уй-хир, вăрман та вăл, çаран.
Вăл ытарми юман кĕрнекĕ...
Нихçан та тухмĕç асăмран.
Чăваш сăвви, юмах-халапĕ
Тăван çĕр-шывшăн чи хакли.
Янрать паян чăвашăн чапĕ,
Вăл мĕскĕн мар, сывлать туллин.
Ик-виç чĕлхе чăваш пĕлет халь,
Эппин ăс-тăн та анлăрах.
Йăхне-ратне çеç ан сивлетĕр,
Пулман нихçан чĕлхи кăра.
Астăвакан çакна пурах-тăр:
"Чăвашăн сăмахне мансан,
Чăвашăн çăмахне те мантăр!"—
Çапла каланă авалтан.
Тăван чĕлхемĕрĕм — çĕр-шыв вăл,
Тăван аннемĕр евĕрех.
Çакна туйсан кашни хĕр-ывăл
Телейлĕ пулĕ ĕмĕрех!
| | Категори: Валентина Рудникова | Кам хушнă: mixaj_58 (24.04.2012)
| Автор: Валентина Рудникова
| | Миçе çын вуланă: 339
| Рейтинг: 5.0/1 |
|
|
|
| Статистика |
Кунта халĕ: 4 Хăнасем 4 Юзерсем 0 |
!--
|
