Салтака кайма ят тухрĕ. Эпĕ курсант тумне тăхăнма кăмăлларăм. Çар комиссариатĕнче манăн шухăша ырларĕç. Эпĕ Омскри çар аслă училищине суйласа илтĕм.
Палăртнă вăхăтра Шупашкартан вунпилĕк çамрăк Канаша çул тытрăмăр: иккĕш-виççĕш — ял ачисем, ьптисем — хуларан. Эпĕ заводра ĕçленине шута илсе çар комиссарĕ мана çав ушкăнăн асли пулма палăртрĕ. Канашра çĕр каçнă хыççăн Омска çитекен пуйăс çине лартăмăр. Вакуна вырнаçсан кăнтăр апатне пуçтарăнтăмăр.
Кашнин салтак кутамкки пур. Кам мĕнле апат-çимĕçпе пуян, çавна кăларчĕ. Халĕ ĕнтĕ эпир пĕр çемье. Пур — пĕрле, çук — çурмалла. «Кăлпасси санăн, чăкăчĕ манăн» тесе уйăрса тăмастпăр.
Шупашкар районĕнчи Улати кутамккинчен сĕтел çине шăрттан кăштăрт кăларса хучĕ. Чăн-чăн чăваш шăрттанĕ. Салтак ачисем ку хура-хăмăр питлĕ чăмăрккана курсан: «Ку мĕн ара? — тесе Улатирен кулма пуçларĕç. — Çимелли япалах-ши ку? Вăркăнтар ăна кантăкран!»
Эпĕ çакăн пек шăрттана Ехрем хуçа Чулхула ярмăрккинче сутса палăрнине пĕлтертĕм. Акăлчан купсисем тутанса пăхнă та ăна питĕ килĕштернĕ. Вара вĕсем шăрттан усламçипе çак çимĕçе тăтăшах туянса тăма алă çапаççĕ. Çавăн хыççăн Ехрем хуçа чăваш шăрттанне ют çĕрсене Атăл тăрăх пăрахутпа тăтăшах ăсатнă. Техĕмлĕ типĕтнĕ какай вĕт. Сивĕрен те, шăрăхран та хăрамасть. Виç-тăватă çул мар, вуншар çул та упранма пултарать тенине те илтнĕ. Çавăнпа чăвашсен салтак ачисене шăрттан парса ярасси йăлана кĕнĕ. Çавна шута илнĕ ĕнтĕ Улатин ашшĕ-амăшĕ.
Мĕн тăвас тен, хула çамрăкĕсем шăрттан çисе курман, унăн тути-масине пĕлмен. Анчах та эпĕ, килте шăрттан çисе ӳснĕскер, хаклă çимĕçе пăрахтармарăм.
— Эсир хулари апат-çимĕçпе сăйланăр, мана шăрттан та пырĕ, — терĕм те ăна пĕчĕккĕн касса илсе вĕри чейпе çиме пуçларăм.
Омск хулине Канаш пуйăсĕ виçĕ талăк ытла каять. Талăк иртсен пулас курсантсен апат-çимĕçĕ пĕтрĕ. Вĕсем хайхи кашни чарăнура станцисенчи буфета чупаççĕ, унтан кукăль-пĕремĕк йăтаççĕ. Эпĕ ниçта та тапранмастăп: манăн пăхма илĕртӳллех мар пулсан та, тутипе питĕ техĕмлĕ шăрттан пур-çке. Çапла шăрттанпа виçĕ талăк ытла рехетленсе кайрăм. «Тавах ăна пĕçерекене», — тесе савăнса пытăм.