Курсаттăм эп Карелире
Шап-шурă çурçĕр хурăнне —
Çурта пек тӳрĕ ӳснине.
Çав хурăнран илемлĕрех
Сан кĕлеткӳ, савниçĕм.
 
Курсаттăм эп Ливадире
Илемлĕ роза чечекне —
Кăвар пек çунаканнине.
Çав розăран чипертерех
Сан сăн-питӳ, савниçĕм.
 
Курсаттăм эпĕ Тухăçра
Казах пуш хирĕн кăлканне —
Сап-сарă пурçăн пеккине.
Çав кăлканран та сарăрах
Санăн çӳçӳ, савниçĕм.
 
Курсаттăм эпĕ тайгара
Çурçĕр çĕмĕрчĕн çырлине —
Агат пек çиçекеннине.
Çав çырларан та хурарах
Санăн куçу, савниçĕм.
 
Хура çунатсене авса,
Чĕкеç вĕçет ак улăхра;
Чĕкеç вĕçмест-мĕн улăхра —
Чĕкеç çуначĕ пек-мĕн сан
Куç харшисем, савниçĕм.
 
Пăхап та эпĕ сан çине —
Курап çĕршывăн илемне,
Курап çĕршывăн телейне,
Курап çĕршыв пуласлăхне,
Ман тантăшăм, савниçĕм!

Ватăлатпăр имĕш. Сухала
Тантăшсем кун сиктерсех хыраççĕ.
Манăн авă (чăмăртăр алла!)
Арăм çăмăлланчĕ — çын çуралчĕ.
 
Çын çуралчĕ, ман пĕрремĕш ывăл!
Шелепи çуралнă кун тата!
Кутамас ача, патвар та сывă,
Чĕрĕк пăт таять вĕт, тупата!
 
Микулай хурасшăнччĕ ятне
Амăшĕ, а эпĕ килĕшмерĕм.
Çывăх туйăнчĕ мана Сетнер
(Кĕçттентин Васильевич Сетнерĕ).
 
Ман Сетнер! Кулать-и вăл, йĕрет-и, —
Ан та çыр эс сăвă ун пек чух.
Пăхăнмасть вăл сăвăçа пĕрре те,
Нимĕнле саккун та уншăн çук.
 
Ак вăл (чăрмантарчĕ те мана!) —
Çывăрать ĕшеннĕ утаманăн.
Канлĕ ыйхă! Кун пек чух ăна
Чуп тăвас килет пĕр вĕçсĕр манăн.
 
Туйăм вăйлă савнăçăн темме...
Тĕлĕкре кулать-и вăл ачашшăн, —
Эпĕ хатĕр савăнса йĕме
Намăса пĕлмесĕр. Ача ашшĕ!
 
Çĕршыва çын патăм эпĕ те.
Кам пулассине халех пĕлеймĕр.
Çĕн этем вăл пулĕ тетĕп эп,
Ма тесен ун ĕмĕрĕ — çĕн ĕмĕр.
 
Ман Сетнер! Вăл кирек кам пулсан та —
Сăвăç-и, колхозник-и — çапах
«Нарспири» Сетнер пек нихăçан та
Мăшкăл тӳсмĕ, пĕлмĕ асапа.
 
Ватăлатпăр имĕш. Сухала
Тантăшсем кун сиктерсех хыраççĕ.
Манăн авă (чăмăртăр алла!)
Арăм çăмăлланчĕ — çын çуралчĕ.

Çын çуралчĕ, ман пĕрремĕш ывăл!
Шелепи çуралнă кун тата!
Кутамас ача, патвар та сывă.
Чĕрĕк пăт таять вĕт, тупата!

Хăраха юлнишĕн тунсăхлан пуль,
Çурçĕрти чечекĕм — сар пикем.
Тухăçа та тинкерсе пăхан пуль
Ирсерен эс, савнă сар пикем.
 
Ман пуç урлă кĕшлетсе иртеççĕ
Анăçа хур кайăк картисем.
Кашнинех салам эп леçтересшĕн
Сан патна, юратнă сар пикем.
 
Чикĕре эп. Аслă çĕршыв пирĕн
Ирĕк, тулăх ешертĕр тесе
Эп постра тăратăп, каç-и, ир-и —
Пур сасса та тимлĕн итлесе.
 
Канăçсăр Амурĕ хумханать-и,
Çил таçтан леçет-и тар шăрши, —
Алла çирĕп пăшала тытап эп:
Канлĕ çитĕн тетĕп, ман çĕршыв!
 
Хăраха юлнишĕн тунсăхлан пуль,
Çурçĕрти чечекĕм — сар пикем.
Тухăçа та тинкерсе пăхан пуль
Ирсерен эс, савнă сар пикем.
 
Тунсăхна сирсем эс! Çĕршыв пирĕн
Сарлакан ем-ешертĕр тесе
Эп постра тăратăп, каç-и, ир-и —
Пур сасса та тимлĕн итлесе.

Чĕрӳ, сăвăç, сан — тăмра,
Йĕс хĕлĕх — юн çулĕ,
Тăмраçă — ăс-хакăл.
 
Анчах янкăс кĕвĕре
Хальхи харсăр тапхăрта
Пирĕн çук-ха гени.
 
Килмен чеп-чечен хирĕ,
Ӳсмен хурçă заводра
Çĕнĕлле «Евгений».
 
Пире ĕмĕр ĕмĕртет
Кун-çулне — виçеллĕ,
Пурнăçне — тăкаксăр,
Çавăнпа ку ĕмĕрте
Кам сенкейĕ меллĕн,
Ун ĕç юлĕ хаксăр.
 
Хурçă ĕмĕр хӳмĕнче,
Халь утар-ха тимлĕн,
Пурнăçпа пĕр харăс.
 
Вара пурнăç умĕнче
Пирĕн кĕвĕ имлĕн
Тин юхма пултарĕ.

Пире хирĕç юпасем
Ăмăртсах чупаççĕ.
Уй-хир тумшĕн куçăмсем
Ман каçсах каяççĕ.
 
Эх, илемлĕ-çке уй-хир
Çимĕçпе ларсассăн.
Ясмăк,
левер,
Сĕлĕ,
Вир,
Ав, иртеççĕ кассăн...
 
Вут-пăс туртнă хурçă лав
Малаллах васкасшăн,
Хресченсем те, курăр, ав,
Çĕнĕ хир тăваççĕ.
 
Сакăр пусăллă уй-хир...
Паллă, ял çĕнелнĕ.
Çĕнĕ пурнăç тилхепи
Кунта, чăн, чĕнленнĕ.
 
Хурçă лав пек вут-вăйсем
Халь уй-хир те кӳрнĕ.
Ав лерех колхозниксем
Хурçă трактор кулнĕ...
 
Кантăк тĕлпе юпасем
Вĕлт! те вĕлт! иртеççĕ.
Пуçăмра ман шухăшсем —
Ял,
Хула тивлечĕ.
 
Хапрăк-савăт труписем
Халь таçта та хĕмлĕ.
Вăй-халтан ĕçлекенсем
Çĕнĕ ĕçшĕн тимлĕ.
 
Эп вĕт хам та ĕçлекен,
Ĕçпелех вĕретĕп.
Пичет ĕçшĕн кунсерен
Хута тĕрĕлетĕп...
 
Хурçă савăт,
Çеçен хир,
Сирте çук асаплăх.
Пичетле,
Хăть тырă выр -
Маншăн ĕç сăваплă.
 
Эх, илемлĕ хир чĕрçи
Çимĕçпе ӳссессĕн -
Ясмăк,
Вика,
Вир,
Пăрçи
Куç умне ӳксессĕн.
 
Ешĕл улăх,
Уй-хир,
Ял,
Маншăн эсĕр —
Ылтăн.
Хурапа ял, алран ал
Пер çул тытăр хыттăн.
 
Урăх юхмĕ хир, сăрт-вырăн
Юнлă тар-куççулĕ.
Кĕç хирех килсе çывхарĕ
Хурçăланнă кӳлĕм...