Сергеев Геннадий Сергеевич халăх пултарулăх тата шÿт ăстине, Красноармейскинчи Культура çурчĕ çумĕнчи Халăх хорĕн юрăçине тата Халăх театрĕн артистне 2019 çулта Трак ен халăхне хăйĕн иксĕлми пултарулăхĕпе паллаштарса тăнăшăн, халăх пултарулăхне аталантарас ĕçре сумлă тÿпе хывнăшăн, обществăлла ĕçсене хастар хутшăннăшăн. Лауреат ятне пама Красноармейскинчи Культура çуртĕнчи Халăх театрĕн, Халăх хорĕн тата унта ĕçлекен культура ĕçченĕсен пĕрлехи пухăвĕ тăратнă.

Сергеев Геннадий Сергеевич 1933 çулта Чăваш Республикин Вăрмар районĕнчи Пысăк Енькасси ялĕнче çуралнă. Калининградри милици шкулне пĕтернĕ, кун хыççăн – СССРăн Шалти ĕçсен министерствин аслă шкулне. Рыбинск хулинче, Хĕрлĕ Чутай, Çĕрпÿ, Етĕрне, Йĕпреç, Вăрмар, Красноармейски районĕсенчи шалти ĕçсен пайĕсенче ОБХСС оперуполномоченнйĕнчен тытăнса пуçлăх таранах тăрăшса ĕçленĕ. Халĕ – отставкăри майор. Ĕс ветеранĕ. Красноармейски Культура çурчĕ çумĕнчи Халăх театрĕн чи хастар пайташĕ. Шанса панă рольсене чунтан тăрăшса вылять. Вăл Ф.Павловăн «Ялта», Юхма Мишшин «Уйăх тулнă каç», А. Чебановăн «Тарçă», П. Осиповăн «Икĕ каччăн пĕр шухăш», «Ылханнă йăх», В. Синичкинăн «Салтак амăшĕ», Н. Сидоровăн «Шупашкарти савни», «Шăматкун каçхине», Çеçке çурчĕ юрату», «Юрату – шÿт мар», Мунча Мишшин «Кăмака çинче ларса качча каяймăн», Маргарита Михайлован «Шăпа» тата ытти пьесăсенчи сăнарсене спектакльсенче калăпланă.