Илпек Микулайĕ (Николай Филиппович Ильбеков) (1915-1981 çç.) çуралнăранпа 95 çул çитрĕ. Чăваш литературипе культурин паллă ĕçченĕ. Чăваш халăх çыравçи‚ проза ăсти‚ публицисчĕ ЧР Шăмăршă районĕнчи Виçпÿрт Шăмăршă ялĕнче çуралнă. Чăваш патшалăх пединститутĕнчен вĕренсе тухнă. Учительте‚ хаçат-журнал редакцийĕсенче‚ кĕнеке издательствинче ĕçленĕ. Вăрçăра пулнă.

Садсем чечекре, сенкер тỹпере кулса пăхакан сарă хĕвел çут çанталăка татах та илемлетет. Шăпах çак ытарма çук савăк вăхăтра тăхăрвунă çул каялла çут тĕнчене килнĕ те ĕнтĕ Илпек Микулайĕ _ Чăваш халăх писателĕ, вилĕмсĕр "Хура çăкăр" роман авторĕ. 
Литература ĕçне XX ĕмĕрĕн 30-мĕш çулĕсенче тытăннă. Паллă кĕнекисем: "Эпир совет салтакĕсем”‚ "Тăватă кун”‚ "Сурпан”‚ "Хура çăкăр”… Вырăсларан чăвашла куçарас тĕлĕшпе те нумай ĕçленĕ. В. Каверинăн "Икĕ капитан” романне‚ Н. Гоголĕн "Вилĕ чунсем” сыпăкĕсене‚ Чехов‚ Франко‚ Горький… калавĕсене куçарнă.
Илпек тени ытлăх-çитлĕхе пĕлтерет. Чăнах та, Николай Филипповичăн кăмăлĕ-талайĕ яланах ытлă-çитлĕччĕ. Такам валли те ăшă тупăнатчĕ унта. Сиплĕхлĕ ăшă, пархатарлă ăшă. Хăйĕн вăрăм мар кун-çулĕн вунпĕр çулне Николай Филиппович Тăван çĕршывăмăра алла хĕç-пăшал тытса хỹтĕлес чыслă ĕçе панă. 1937 çулта салтак çи-пуçĕ тăхăннă та, 1948 çулчченех çарта тăнă, вăрçă вут-çулăмĕ витĕр тухнă. Сталинград патĕнчи синкерлĕ çулсенчен пуçласах дивизи хаçачĕн редакторĕ пулнă, çапăçусенчи хăюлăхĕпе паттăрлăхĕшĕн Хĕрлĕ Çăлтăрпа Отечественнăй вăрçă орденĕсене, нумай медале тивĕçнĕ. Çакă мар-и ĕнтĕ пирĕншĕн чăн-чăн этем тĕслĕхĕ? Илпекĕн пултарулăх еткерĕ çав тери сумлă: ăсталăх ахах-мерченĕпе çиçсе тăракан калавĕсемпе новеллисем, шухăш-туйăм сулмаклăхĕпе тыткăнлакан "Хура çăкăрпа" "Тимĕр" романĕсем, Тăван çĕршыв ĕçченĕсен кăмăл пуянлăхне мухтакан повеçсем, тăван çырулăх малашлăхĕшĕн хыпса-çунса хайланă статйисем, чун хĕлхемĕпе шăрçаланă очеркĕсем.. Унтан тата куçарури ĕçне-хĕлне те шута илмелле: Илпек В.Каверинăн "Икĕ капитан", И.Вазовăн "Пусмăрта" романĕсене, М.Горький, И.Франко, А.Чехов, Л.Кассиль, Ю.Сотник тата ыттисем çырнисене чăваш чĕлхин сĕткенлĕхне пилленĕ.