Тунтикун Анат Кама хулипе районĕнчи Чăваш наципе культура центрĕн отчетпа суйлав конференцийĕ иртнĕ. Унта ТР ЧНКА Канашĕн председателĕ К.Г.Яковлев, хула администраци представителĕсем, вырăнти чăвашсем хутшăннă. Центра ертсе пыракан 34№ гимнази директорĕ А.П.Гаврилов отчет тунă хыççăн пухăннисем хăйсен общество ĕçне сӳтсе явнă. Администрацие хулапа кăна ĕçленĕшĕн критиклекенсем те пулнă. Анат Кама районĕнче Камские Полянынче те, Шереметьевăра та, ытти ялсенче те чăвашсем йышлă пурăнаççĕ, вĕсемпе те ĕçе активлăрах илсе пымалла. Ун хыççăн К.Г.Яковлев сăмах илнĕ. Вăл А.П.Гаврилов ĕç нумаййине пула хăйне Анат Камăри ЧНКЦ председателĕнчен кăларма ыйтни çинчен пĕлтернĕ те, ертӳçĕ пулма В.М.Юнусовăна суйлама сĕннĕ. Çĕнĕрен суйланă Канаш ун сĕнĕвĕпе килĕшнĕ, виçĕ кандидатурăран общество ĕçĕнче тахçантанпах вăй хуракан Вера Михайловна Юнусова ытларах сасă пухнă.
Отчетпа суйлав конференцийĕ хыççăн анаткамăсене В.Христофоров ертсе пыракан «Янра юрă» ушкăн концерт кăтартнă.