Кăрлач уйăхĕн 22-мĕшĕнче район вулавăшĕн вулав пÿлĕмĕнче Нестер Янкас ячĕллĕ пĕрлĕх правленийĕн черетлĕ ларăвĕ иртрĕ. Ăна пĕрлĕх правленийĕн председателĕ Георгий Тусли ертсе пычĕ. Янкасçăсем Нестер Янкас ячĕллĕ пĕрлĕхĕн 20 çулхи юбилейне хатĕрленес ĕç епле пынине сÿтсе яврĕç, çитес вăхăтра тумалли ĕçсене палăртрĕç.  Нестер Янкас ячĕллĕ Преми лауреачĕн кăкăр çине çакмалли паллăна хатĕрлес ĕç мĕнле пынине те тишкерчĕç. Кунсăр пуçне кăçалхи çулталăк календарĕн паллă кунĕсене, районта çуралса ÿснĕ тата унăн тулашĕнче палăрнă ентешсен юбилейĕсене уявлас пирки калаçу пулчĕ.

Ларăва Н.Ершов, Л.Илларионов, В.Константинов, Н.Никоноров, С.Гурьева тата В.Михайлов хутшăнчĕç, тухса калаçрĕç, ĕçлĕ сĕнÿсем пачĕç.