Красноармейски вăтам шкулĕнче нумай çул хушши ĕнтĕ чăваш литературине кăмăллакансен “Кăмăл” вĕренÿ пĕрлешĕвĕ ĕçлет. Ăна чăваш чĕлхипе литературине вĕрентекен З. П. Михайлова ертсе пырать. Зинаида Петровна пулăшнипе ачасем сăвă-калав çырма хăнăхаççĕ, “пиçсе çитнĕ” хайлавĕсене пухса ятарлă кăларăмсем хатĕрлеççĕ. Вĕсенчен чи килĕшнисене вара шкулти, районти конкурссене тăратаççĕ, тĕрлĕ хаçатсенче пичетлеççĕ. Иртнĕ уйăхра республикăри “Тантăш” хаçат вĕсен сăввисене пухса пĕр страница вырăн пачĕ. “Кăмăл” пĕрлешÿ районти кăçалхи сентябрьпе октябрь уйăхĕсенче иртнĕ çамрăк сăвăçсен конкурсне те активлă хутшăнчĕ. Хайлавсен пахалăхĕ енĕпе кунти сăвăçсене çитекенни пулмарĕ. Вĕсем тупăшăва 13 сăвă тăратнă. Жюри членĕсене уйрăмах 9-мĕш класра вĕренекен Александра Яковлеван “Чи хаклă çыннăм”, “Юратнă вĕрентекен”, “Тăван ялăм — савнă ялăм” сăввисем килĕшнĕ. Ăна Н. Ершов сăвăç ячĕллĕ районти литература конкурсĕн çĕнтерÿçи тесе йышăннă — лауреат ятне панă. Чÿк уйăхĕн пуçламăшĕнче “Кăмăл” пĕрлешĕве çÿрекенсем хăйсем патне хăнасем пухрĕç. Çав йыша Н. Ершов çыравçă хăй те кĕчĕ. Унпа пĕрле районти Н. Янкас ячĕллĕ литературăпа искусство тата культура пĕрлĕхĕн ертÿçи Г. Ефимов-Тусли тата район центрĕнчи тĕп библиотека ĕçченĕ С. Гурьева пулчĕç. Çак ушкăн тепĕр сăлтавпа та пынă-ха: нумаях пулмасть çамрăк сăвăçсен конкурсĕн хуçи Н. Ершов-Янгер поэт çуралнăранпа 70 çул çитрĕ. Çавна кунти шкул ачисем те паллă тăвас тенĕ. Вĕсене тулли кăмăлпа кĕтсе илчĕç.Чи малтанах С. Гурьева Н. Ершовăн пурнăçĕпе пултарулăхне сăнлакан электронлă презентаципе паллаштарчĕ, ятарлă буклетсене валеçсе пачĕ. Ку ĕçе поэта хăйне те явăçтарчĕ. Иккĕшĕ ылмашăнса поэтăн чи лайăх сăввисене вуларĕç. “Кăмăл” ушкăнри Саша Осипов, Надя Козлова, Мария Данилова, Настя Харитонова, Александра Яковлева та ентеш сăввисене пăхмасăр вуларĕç. Вĕренекенсем ыйтнипе поэт хăй сăввипе çырнă “Чĕререн ытарми савнă ял” юррине юрласа пачĕ. Н. Ершов хăйĕн литературăри каçалăкĕсене кĕскен аса илнĕ хыççăн хăй ячĕллĕ çамрăк сăвăçсен конкурсĕн пĕтĕмлетĕвĕпе паллаштарчĕ. Тупăшура пĕрремĕш вырăн йышăннă ку шкулти Александра Яковлева вĕренекене конкурс лауреачĕн дипломĕпе чысларĕ, укçан преми пачĕ тата хăйĕн сăввисен кĕнекине парнелерĕ. Хавхалантармалли парнесене “Кăмăл” пĕрлешÿн хастарĕсем — Нина Кириллова, Кристина Семенова, Настя Иванова, Мария Данилова, Настя Харитонова тивĕçрĕç. Юлашкинчен Н. Янкас ячĕллĕ пĕрлĕх ертÿçи Г. Ефимов тĕл пулу саманчĕсене пĕтĕмлетсе пысăк хак пачĕ, юбиляра пĕрлĕхĕн мухтав хучĕпе чысларĕ, хут купăспа каласа юрă парнелерĕ.