Чÿк уйăхĕн 1-мĕшĕнче Красноармейски шкулĕн тăван ен культурипе халăх сăмахлăхĕн пÿлĕмĕнче "Кăмăл" вĕренÿ пĕрлешĕвĕнче хушма пĕлÿ илекен тата чăваш поэзине кăмăллакан ачасемпе Николай Янгер сăвăç тĕл пулу ирттерчĕ. Сăлтавĕ те пысăк. Ентеш поэтăмăр çак кунсенче 70 çулхи уявне паллă турĕ. Чи малтанах юбилярăн пурнăçĕпе пултарулăхĕ çинчен районти централизациленĕ вулавăшăн тĕп библиотекарĕ С.А.Гурьева каласа кăтартрĕ, хăйĕн сăмахне поэта халалланă мультимедиллĕ слайдсемпе пуянлатрĕ. Сăвăç вара презентаципе килĕшÿллĕн  хăйĕн сăввисене вуласа пачĕ.

Юпа уйăхĕнче пултаруллă çыравçă Нестер Янкас ячĕллĕ пĕрлĕх правленийĕ сĕннипе "Ял пурнăçĕ" хаçат урлă районти шкул ачисем хушшинче хăй ячĕллĕ çамрăк сăвăçсен литература конкурсне йĕркелерĕ. Конкурса 20 сăвăçăн 50 ытла хайлавне тăратнă.  Тĕл пулура Николай Ершов çак конкурс пĕтĕмлетĕвĕпе те паллаштарчĕ. Сăвăç ячĕллĕ Премие (500 тенкĕ) Красноармейски шкулĕн 9-б класĕнче вĕренекен Александра Яковлева  илме тивĕçлĕ пулчĕ. Ăна Н.Янгер çакна çирĕплетсе Диплом парса чысларĕ. Ку шкул ачисем хушшинче хавахалантару парнине илекенсем те пулчĕç. Вĕсем: Анастасия Харитонова (8-б), Мария Данилова (9-б), Анастасия Иванова (10 класс), Нина Кириллова (11-а) тата Кристина Семенова (11-а). Çак çамрăк сăвăçсене поэт хăйĕн "Пурнăç сăпки" сăвă кĕнекине парнелерĕ.

Тĕл пулăва Нестер Янкас ячĕллĕ литературăпа искусство тата культура пĕрлĕхĕн председателĕ Георгий Тусли те хутшăнчĕ. Вăл юбиляра литература пултарулăхĕнчи ÿсĕмсемшĕн пĕрлĕх Хисеп хутне парса чысларĕ, юрă-ташапа савăнтарчĕ.

"Кăмăл" вĕренÿ пĕрлешĕвĕн ачисем Николай Ершовăн сăввисене вуласа пачĕç. Çак пĕрлешĕвĕн ертÿçи З.П.Михайлова поэтăн литературăри иксĕлми талантне çамрăксен тишкермеллине, унран сăвă çырас ăсталăха вĕренсе пымаллине палăртрĕ. Вĕрентекен поэтăмăра юбилей ячĕпе ăшшăн саламларĕ, ырлăх-сывлăх, телей, çитĕнÿ сунчĕ.